İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 202 Hüküm no: 202 Orijinal metin no: [44-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehir, nafaka ve eytâm malından dolayı hüküm giymiş olan borçluların borçlarını ödememeleri halinde hapsolunması Taraf-ı vâlâ-yı Fetvâ-penâhîye Başvekâlet Dâiresi Mektûbî Kalemi Aded 63 Ma‘rûz-ı bende-i dîrîneleridir ki, İcrâ kānûnu hükmünce medyûnun habsedilmesi bir aylık nafakasının dâyin tarafından def‘aten i‘tâsına mütevakkıf ise de ekser eytâmın halleri buna müsâ‘id olmadığından mehir ve nafakadan dolayı mahkûm olanlar hakkında icrâ olunan mu‘âmeleye tevfîkan eytâma medyûn bulunanların nafaka bedeli yetîmlerden alınmaksızın habsedilmesinin İcrâ Kānûnu’na tezyîli taraf-ı vâlâ-yı Fetvâ-penâhîlerinden vukū‘ bulan iş‘âr ve Adliye Nezâret-i celîlesiyle cereyân eden muhâbere üzerine Şûrâ-yı Devletçe bi’t-tensîb ol bâbda kānûn-ı mezkûrun otuz dokuzuncu maddesine zeyl edilmek üzere kaleme alınan fıkra-i kānûniye müsveddesinin Meclis-i Mahsûs-ı Vükelâ karârıyla lede’l-arz mer‘iyyetine irâde-i seniyye-i hazret-i pâdişâhî şeref-sudûr buyrularak nafaka-i mezkûrenin îfâ-yı muktezâsı zımnında nezâret-i müşârün-ileyhâya gönderildiği misillü bir sûreti dahi leffen tesyîr-i sûy-ı sâmî-yi Meşîhat-penâhîleri kılınmış olmağın ol bâbda emr ü irâde hazret-i men-lehu’l-emrindir. Fî 8 Şa‘bân sene [1]299 ve fî 12 Haziran sene [12]98. Abdurrahman İ‘lâmât-ı hukūkiyenin sûret-i icrâsına dâir kānûnun otuz dokuzuncu maddesi zeyli Mehir ve nafakadan ve emvâl-i eytâmdan dolayı mahkûm olan medyûnlar îfâ-yı deynlerinden imtinâ‘ eyledikleri hâlde otuz ikinci ve otuz üçüncü maddelerin hükmünden müstesnâ tutularak her hâlde habsolunur ve otuz altıncı madde hükmünce dâyinler tarafından infâk olunmaz. Fî 18 Receb sene [1]299 ve fî 24 Mayıs sene [12]98.