Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 551 Hüküm no: 671 Orijinal metin no: [117a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Hüseyin Efendi b. Hasan Efendi’nin menzilini Abdi Çelebi b. Sami’ye sattığı Mülknâme-i Abdi Çelebi. Mahmiye-i İstanbul’da Topkapısı dâhilinde Kürkçübaşı sükkânından umdetü’l-meşâyihi’l-kirâm eş-Şeyh Hüseyin Efendi b. el-merhûm Hasan Efendi tarafından husûs-ı âti’l-beyâna vekîl olduğu Ali Dede b. Mehmed ve İbrahim Çelebi b. Ahmed şehâdetleriyle şer‘an sâbit olan Ali Çelebi b. Sâmi meclis-i şer‘-i şerîf-i enverde işbu bâ‘isü’l-kitâb Abdi Çelebi b. İbrahim mahzarında ikrâr-ı tâm ve takrîr-i kelâm [edip] müvekkilim mûmâ-ileyh eş-Şeyh Hüseyin Efendi yedinde mülk ve hakkı olup mahalle-i mezbûrede vâki‘ bir tarafdan Dâmâd Hasan Efendi bahçesi ve bir tarafdan süknâsı şeyhlere meşrûta vakıf menzil ve bir tarafdan Yavaşça vakfı ve bir tarafdan tarîk-i âm ile mahdûd ve tûlen ve arzen bi hesâb-ı terbî‘î otuz altı zirâ‘ mülk arsa üzerinde mebnî bir bâb oda ve bir sofayı müştemil mülk menzilini, bi cümleti’t-tevâbi‘ ve’l-levâhık merkūm Abdi Çelebi’ye bey‘-i bâtt-ı kat‘î ile yüz elli guruşa bey‘ ve teslîm ol dahi iştirâ ve tesellüm ve kabûl ettiğinden sonra semeni olan meblağ-ı mezbûr yüz elli guruşu yedinden tamâmen ahz u kabz eyledi ba‘de’l-yevm menzil-i mahdûd-ı mezbûr cümle arsa ve ebniyesiyle merkūm Abdi Çelebi’nin mülk-i müşterâsı olmuşdur müvekkil-i mûmâ-ileyhin anda aslâ alâka ve medhali kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ve’l-ibtigā ketb olundu. Fi’l-yevmi’s-sâdis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mustafa Efendi el-İmâm, Sâlih Efendi el-İmâm, Mehmed Efendi İmâmzâde, Mustafa Çelebi b. Sunullah, Mustafa Çelebi Külâhî, Ali Çelebi b. Ömer, İbrahim Çelebi b. Ahmed.