Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 551 Hüküm no: 670 Orijinal metin no: [116b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. İbrahim’in evini Deli Birader Vakfı’na bey‘ bi’l-istiğlâl yoluyla sattığı İstiğlâl hüccetidir. Mahrûse-i Galata’ya tâbi‘ Kasaba-i Kasımpaşa’da Küçük Piyâle mahallesi sâkinlerinden Ali b. İbrahim nâm kimesne meclis-i şer‘-i şerîfde mahmiye-i İstanbul’da merhûm Deli Birader vakfına bi’l-fi‘l mütevellî olan bâ‘isü hâze’l-kitâb Ebûbekir Efendi b. Hasan nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ iki tarafdan Mustafa Çelebi mülkü ve iki tarafdan tarîk-i âm ile mahdûd büyût-ı adîde[yi] müştemil menzilimi cümle tevâbi‘ ve levâhıkı ve kâffe-i hukūk ve merâfıkı ile menzil-i mezbûra üç bin yüz on üç ceyyid ve cedîd paraya bi tarîki’l-istiğlâl bey‘ ve teslîm ol dahi ber vech-i muharrer yedinde olan mâl-ı vakf-ı mezbûr ile iştirâ ve tesellüm eylediğinden sonra semeni olan meblağ-ı mezbûru yedinden tamâmen ahz u kabz eyledim mütevellî-i mezbûr Ebûbekir Efendi menzil-i mahdûd-ı mezkûrûn gıbbe’t-tahliyyeti’ş-şer‘î ve’t-tekābuzi’l-mer‘î târih-i kitâbdan bir sene tamâmına değin yüz yetmiş altı mezbûrü’l-vasf paraya yine bana îcâr ve teslîm ben dahi minvâl-i muharrer üzre istîcâr ve kabûl eyledim dedikde gıbbe’t-tasdîki’ş-şer‘î menzil-i mezbûr derkine ve ücret-i merkūmeye mahalle-i mezbûre ahâlîsinden Abdullah Efendi ve Ahmed Çelebi nâm karındaşlar tarafeynden emr ve kabûlü hâvî kefâlet-i sahîha-i şer‘iyye ile kefîl olmağın mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Ali Efendi b. Mustafa, Arnavud Mustafa Ağa, Mehmed Çelebi b. Receb, Mustafa Çelebi b. Resul, İbrahim Çelebi b. Ahmed.