Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 553 Hüküm no: 673 Orijinal metin no: [117a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vartan v. Bedros’un Karabet’te olan alacağını kefillerden tahsil etmesi Kefîl ve asîl zimmetlerini ibrâ Mahmiye-i İstanbul’da Tavukpazarı kurbunda sâkin Vartan v. Bedros meclis-i şer‘-i şerîf-i enverde işbu bâ‘iseyi’l-vesîka Kiragos v. Mıgırdiç ve David v. Haçuk muvâcehelerinde ikrâr-ı tâm ve takrîr-i kelâm [edip] mezbûr Kiragos’un karındaşı işbu hâzır bi’l-meclis Karabet zimmî zimmetinde cihet-i deyn-i şer‘îden yüz esedî guruş hakkım olup meblağ-ı mezbûra merkūm Karabet’in emriyle bundan akdem mezbûrân Kiragos ve David kefâlet-i sahîha-i şer‘iyye ile kefîller olmağla meblağ-ı mezbûrun nısfını mezbûr Kiragos ve nısf-ı âharını merkūm David bi hükmi’l-kefâle bana edâ ve teslîm ben dahi bi’t-tamâm yedlerinden kabz ve tesellüm edip meblağ-ı mezbûr yüz esedî guruşa ve sâire müte‘allika mezbûrûn Kiragos ve David ve Karabet’in zimmetlerini ibrâ ve iskāt eyledim min ba‘d da‘vâ ve nizâ‘ım yoktur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Hüseyin b. Mehmed, İbrahim Çelebi b. Ahmed, İvaz Efendi b. Şaban, Mehmed Çelebi b. Hasan, Mehmed Çelebi b. İdris, Mustafa Beşe b. Murad.