Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 554 Hüküm no: 674 Orijinal metin no: [117b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Ahmed Beşe’nin Ahmed b. İvaz’dan muhâlaa yoluyla boşandığı Muhâla‘a Mahrûse-i Galata’ya tâbi‘ kasaba-i Kasımpaşa’da Piyâle Paşa mahallesi sâkinelerinden olup zâtı ma‘rifet-i şer‘iyye ile ârifân Mehmed Çelebi b. İdris ve İsmail Çelebi b. Mustafa nâm kimesneler ta‘rîfleriyle mu‘arrefe olan Hatice bt. Ahmed Beşe nâm hâtun meclis-i şer‘-i şerîf-i enverde zevc-i muhâlı‘ı bâ‘isü hâze’l-kitâb Ahmed b. İvaz nâm kimesne mahzarında ikrâr ve takrîr-i kelâm edip zevcim mezbûr Ahmed zimmetinde mütekarrir ve ma‘kūdun-aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak [üzre] zevcim mezbûr Ahmed ile muhâla‘a-i sahîha-i şer‘iyye ile muhâla‘a edip ol dahi ber vech-i muharrer muhâla‘a-i mezbûreyi kabûl ettiğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Hüseyin Çelebi b. Mehmed, Ahmed b. Ahmed, Ali b. Receb, Ali b. Şaban, Hüseyin b. İbrahim, bezzâzîbaşı el-Hâc Süleyman, ketanî Mustafa Çelebi.