İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 256 Hüküm no: 266 Orijinal metin no: [85-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bab Mahkemesi Başkâtibi Nuri Efendi’nin Çatalca Nâibliği’ne atanmasıyla yerine mukayyid Mehmed Ziyaeddin Efendi’nin tayin edilmesi Akdemce Çatalca niyâbet-i şer‘iyesiyle bekām buyrulan Bâb Mahkemesi başkâtibi fazîletlü Nuri Efendi dâ‘îlerinin işbu mâh-ı hâl selhinde infisâli tabî‘i bulunacağından yerine mahkeme-i mezkûre ketebesinden Mehmed Rüşdü Efendi dâ‘îleri intihâb kılınmış ise de mûmâ-ileyh Rüşdü Efendi hüsn-i rızâsıyla kitâbet-i mezkûreden keff-i yed ederek kitâbet-i mezkûreye erbâb-ı ehliyet ve istikāmetini tasdîk ile mahkeme-i mezkûre mukayyidi Mehmed Ziyaeddin Efendi dâ‘îleriyle becâyiş-i me’mûriyetleri istid‘âsına dâir mûmâ-ileyh Rüşdü Efendi tarafından bu kere verilen arzuhâl manzûr-ı sâmî-i veliyyü’n-ni‘amîleri buyurulmak üzere leffen arz ve takdîm kılınmış ve mûmâ-ileyh Ziyaeddin Efendi dâ‘îlerinin bir mâhdan beri tecrübe-i sencîde-i nazar-ı dikkatden geçirilen hâline nazaran başkitâbete kifâyetiyle beraber istikāmeti anlaşılmış olmağla nezd-i kerâmet-vefd-i âlî-i veliyyü’n-ni‘amîlerinde re’y ve tasvîb buyrulduğu hâlde îfâ-yı muktezâsına bakılmak üzere işbu takrîr-i dâ‘iyânem işâret-i aliyye-i mün‘imâneleriyle tezyîn ve tevşîh buyurulmak bâbında emr u fermân hazret-i veliyyü’l-emrindir. Fî-selhi Muharrem sene 303. Buyruldu-yı âlî sûreti mûcebince îfâ-yı muktezâsına himmet buyurulması.