İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 258 Hüküm no: 269 Orijinal metin no: [89-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beyzâde Mevlana Hasan Tevfik Bey’in İstanbul Kadılığı’na tayin edilmesi Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘ü’l-a‘lâm-ı şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în esbak İstanbul kādısı olup mecîdî nişân-ı zî-şânının ikinci rütbesini hâiz ve hâmil olan Osman Beyzâde Mevlânâ Hasan Tevfik Bey -zîde fezailehû- tevkī‘-i refî‘-i hümâyûnum vâsıl olıcak ola ki, sen ki mevlânâ-yı müşârün-ileyhsin, senin akrân ve emsâlin beyninde gevher-i ilm ü fazl ile mütehallî ve mevsûf olduğun ve sezâvâr-ı inâyet ve şâyeste-i mekremet bulunduğun cihetle bin üç yüz dört senesi şehr-i Muharremi’l-harâmı gurresinden zabtetmek üzere Dârü’l-hilâfeti’l-aliyye Kādılığı’nın bu kere dahi uhde-i ehliyetine tevcîh ve ihsân kılınması husûsunu bi’l-fi‘il Şeyhülislâm ve müfti’l-enâm olup murassa‘-ı Osmânî ve Mecîdî nişân-ı zî-şânlarını ve imtiyâz nişân-ı hümâyûnumu hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazl ve’l-yakīn Uryanîzâde Mevlânâ Ahmed Esad Efendi -edâmallâhu te‘âlâ fezâilehû- telhîs etmeleriyle mûcebince hakkında mezîd inâyet-i aliyye-i şâhâne ve mezîd re’fet-i seniyye-i pâdişâhânem zuhûra gelip avâtıf-ı aliyye-i mülûkâne ve avârıf-ı behiye-i tâcidârânemden mevhibet-efzâ-yı sünûh ve sudûr olan emr-i hümâyûn-ı şevket-makrûn-ı şâhânem muktezâ-yı münîfi üzere Dîvân-ı Hümâyûn’umdan işbu fermân-ı celîlü’l-unvân-ı pâdişâhânem ısdâr ve i‘tâ olundu, zikrolunan İstanbul kazâsına gurre-i merkūmeden i‘tibâren nâil olup icrâ-yı ahkâm-ı şerî‘at-ı Nebeviyeye …? makrûn ve sa‘y-i mevfûr eyleyesin. Tahrîren fi’l-yevmi’l-hâmis aşer min-şehri Zilhicceti’ş-şerîfe li-sene selâse ve selâse mie ve elf.