İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 258 Hüküm no: 270 Orijinal metin no: [89-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Senet ve diğer evraka yapıştırılan pulların iptali Ma‘rûz-ı bende-i dîrîneleridir ki, Kâffe-i senedât ve evrâk-ı sâireye yapıştırılacak pulların hem târih hem de veyâ mührün birer kısmıyla ibtâli ve bu sûretle pulları ibtâl olunmayan senedât ve evrâk-ı sâirenin pulsuz add ü i‘tibârıyla mu‘âmele-i cezâiye icrâsı hakkında ittihâz olunan karâra nazaran târihleri metnin hâtimesinde ibâre ile yazılmakta olan senedât-ı şer‘iyeye yapıştırılacak pulların ne sûretle ibtâli lâzım geleceği istîzânını hâvî Adliye Nezâret-i celîlesinden vârid olup Şûrâ-yı Devlet’e havâle olunan tezkire üzerine Tanzîmât Dâiresi’nden kaleme alınan mazbatada mehâkim-i şer‘iyeden tanzîm ve i‘tâ olunan senedât-ı şer‘iyenin târihleri metnin hâtimelerinde ibâre ile yazılmak öteden beri mehâkim-i şer‘iyece müttehaz usûl ve kā‘ide iktizâsından olmağla şimdiye kadar bu gibi senedâta vaz‘ olunan pullar mühür veyâ imzâ ile ve ba‘zen yalnız asıl senedin ibâresinin üzerine tahrîriyle ibtâl edilerek maksad-ı kānûn istihsâl edilmekde olduğundan senedât-ı mezkûreye yapıştırılacak pulların ba‘demâ dahi ol vechile ibtâli münâsib olacağının taraf-ı sâmî-i fetvâ-penâhîleriyle nezâret-i müşârün-ileyhâya iş‘ârı ve Düyûn-ı Umûmiye İdâresi’ne ma‘lûmât i‘tâsının dahi Mâliye Nezâret-i celîlesine havâlesi tezekkür kılındığı göster[ilmiş] ve mûcebince nezâret-i müşârün-ileyhâya ma‘lûmât verilmiş olmağla taraf-ı vâlâ-yı meşîhat-penâhîlerince ona göre iktizâsının îfâsı bâbında emr u irâde hazret-i men-lehu’l-emrindir. Fî 15 Zilhicce sene 303 ve fî 2 Eylül sene 302. Sadrıa‘zam Kâmil