İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 274 Hüküm no: 288 Orijinal metin no: [101-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahtakale’de Şer‘iye Mahkemesi olarak kullanılan binanın sahiplerinden satın alınması Taraf-ı Âlî-i Meşîhat-penâhî’ye, Ma‘rûz-ı bende-i dîrîneleridir ki, Tahte’l-kal‘a’da müddet-i medîdeden beri mahkeme-i şer‘iye ittihâz olunmuş olan hânenin Ali ve Abdullah Ağalar ile Ümmügülsüm ve Fâtıma ve Hadîce hânımların uhdelerinde bulunduğu ber-nehc-i şer‘î sâbit olmuş ve bunun yüz elli altın bedel ile cânib-i mîrîye terk ve ferâğına mutasarrıfları irzâ edilip kıymet-i muhammenesine nazaran bedel-i mezkûrun hadd-i i‘tidâlde bulunmuş olduğundan mezkûr hânenin kemâ-kân mahkeme olarak kullanılmak üzere cânib-i mîrîden tefevvüzü ve sene be-sene Mâliye Hazînesi’nden Evkāf-ı Hümâyûn Hazînesi’ne verilmek üzere münâsib mikdâr mukāta‘aya rabtı ile teferru‘âtının îfâsı husûsuna Evkāf-ı Hümâyûn Nezâret-i celîlesinden vukū‘ bulan iş‘âr üzerine Şûrâ-yı Devlet karârıyla bi’l-istîzân irâde-i seniyye-i cenâb-ı pâdişâhî dahi müte‘allik ve şeref-sudûr buyurulmuş ve icrâ-yı îcâbı nezâret-i müşârün-ileyhâ ile Mâliye Nezâret-i celîlesinden bildirilmiş olmağla taraf-ı âlî-i meşîhat-penâhîlerince dahi iktizâsının îfâsı bâbında emr u irâde hazret-i men-lehu’l-emrindir. Fî 4 Şa‘bân sene 305 ve fî 3 Nisan sene 304. Sadrıa‘zam Kâmil