İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 273 Hüküm no: 287 Orijinal metin no: [100-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahkeme ve daire başkanları tarafından yazılan takrir ve tezkerelere pul yapıştırılması Taraf-ı Vâlâ-yı Fetvâ-penâhî’ye, Ma‘rûz-ı bende-i dîrîneleridir ki, Mesâlih-i ibâda dâir mehâkim ve devâir rüesâsı tarafından yazılan tekārîr ve tezâkire pul yapıştırılmak iktizâ edip etmeyeceği bazı tarafdan suâl olunması üzerine keyfiyet Şûrâ-yı Devlet’e havâle olunmuşdu, ol bâbda cereyân eden müzâkerâtı mutazammın Tanzîmât Dâiresi’nden kaleme alınan mazbatada ketebe ve küçük me’mûrlar müstesnâ olmak üzere müstahdem veyâ mütekā‘id me’mûrlar cânibinden mesâlih-i zâtiyelerine dâir yazılan tekārîr ve tezkereler için üç guruşluk pul vaz‘ ve ibtâli kānûnen lâzımeden ise de mehâkim ve devâir-i resmiye beyninde cereyân edecek muhâberâtı hâvî tezâkir ve tekārîr münderecâtının mesâlih-i ibâda dâir olması onları resm-i maktû‘a tâbi‘ evrâk idâdına idhâl edemeyeceğine binâen mehâkim ve devâir rüesâsı cânibinden mesâlih-i ibâda dâir yazılacak tekārîr ve tezâkire pul vaz‘ ve ibtâli lâzım geleceğinin ta‘mîmen devâire teblîği tezekkür kılındığı gösterilmiş ve mûcebince devâir-i sâireye icrâ-yı teblîgāt edilmiş olmağla Bâb-ı Vâlâ-yı Fetvâ-penâhîlerince dahi ona göre îfâ-yı mu‘âmeleye himem-i aliyye-i fetvâ-penâhîleri derkâr buyurulmak bâbında emr u irâde hazret-i men-lehu’l-emrindir. Fî 21 Şa‘bân sene 305, fî [21] Nisan sene 304. Sadrıa‘zam