İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 275 Hüküm no: 290 Orijinal metin no: [101-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gıyabi olarak haklarında hüküm verilenlerin itiraz etme süreleri ile temyiz ve istinaf muameleleri Gıyâben mahkûmun-aleyhin i‘tirâz istid‘âsı kaç gün zarfında kabûl olunmak lâzım geleceğine dâir sarâhat görülemediği cihetle Usûl-ı Muhâkemât-ı Hukūkiye Kānûn-ı Muvakkati’nin yüz elli üçüncü maddesine tevfîk-i mu‘âmele edilmekde ise de bu kānûnun mehâkim-i şer‘iyeye şümûlü olamayacağından bahisle istîzân-ı keyfiyeti mutazammın Karesi vilâyeti Merkez Niyâbet-i Şer‘iyyesi’nden meb‘ûs tahrîrât Meclis-i Tedkīkāt-ı Şer‘iyye’de kırâet olunarak i‘lâmât-ı şer‘iyenin temyîz ve istînafı hakkındaki ta‘lîmât-ı seniyyenin birinci ve ikinci maddelerinde hükm-i gıyâbî i‘lâmlarının müstesnâ olduğuna dâir sarâhat yoğise de Mecelle’nin bin sekiz yüz otuz altıncı maddesi mûcebince hükm-i gıyâbî mahkûmun-aleyhe ancak vicâhen muhâkemeye salâhiyet vermekle tahassus etmiş ve gıyâben mahkûmun-aleyhe vicâhen muhâkemeden evvel i‘tirâz etmek için üç ay ve ba‘dehû vicâhen muhâkeme üzerine de ol mikdâr temyîz müddeti i‘tâsı te’hîrâtı mûceb ve ibtidâ-i emirde muhâkemeye mecbûr olan müdde‘â-aleyhin mahkemeden vukū‘ bulan da‘vete icâbet etmemelerine sebeb olduğu bi’t-tecrübe sâbit olmuş idiğinden kütüb-i fıkhiyede muharrer olduğu vechile gıyâben mahkûmun-aleyhe sûret-i i‘lâm ba‘de’t-teblîğ bir müddet-i kalîle zarfında kendisi veyâ vekîl-i şer‘îsi mahkemeye hazır olarak bi’l-muvâcehe mu‘âmele olunmak ve sonra temyîz ve istînaf mu‘âmelesi icrâ edilmek muvâfık-ı maslahat olacağı tezekkür ve mütâla‘a olunması üzerine keyfiyet Mecelle Cem‘iyeti’ne lede’l-havâle Mecelle-i Ahkâm-ı Adliye’nin bin sekiz yüz otuz altıncı maddesinde gıyâben aleyhine hükmolunan kimse mahkemeye hazır olup da müdde‘înin da‘vâsını def‘e sâlih bir da‘vâya teşebbüs eder ise istimâ‘ ve îcâbı vechile fasl olunur da‘vâyı def‘e teşebbüs etmediği veyâ edip de def‘e sâlih olmadığı takdîrde hükm-i vâki‘ infâz olunur deyü muharrer olduğundan gıyâben mahkûmun-aleyhin hükm-i gıyâbî aleyhine tanzîm ettiği i‘tirâz istid‘âsı evvel-emirde i‘lâmı i‘tâ eden mahkemeye havâle edilerek madde-i mezkûre mûcebince îfâ-yı mu‘âmele olunmadıkça gıyâben aleyhine verilen i‘lâm temyîz ve istînafa havâle olunamayacağının lâzım gelen mahallere iş‘ârı tensîb ve ifâde olunarak keyfiyet bi’l-umûm Dersa‘âdet hükkâm-ı şer‘iyesiyle merâkiz-i vilâyât ve elviye-i müstakille nüvvâb-ı şer‘iyesine izbâr ve mülhakāt nüvvâbına teblîğ ve tesyîr edilmek üzere işbu tahrîrâtın nüsah-ı kâfiyesi matviyyen tisyâr kılınmış olmağla cem‘iyet-i mezkûrenin karâr-ı meşrûhu vechile îcâbının îfâsına himmet buyurulması siyâkında şukka-i mecî terkīm olundu. Fî Cemâziyelâhire sene 305 ve fî Şubat sene 303.