İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 276 Hüküm no: 291 Orijinal metin no: [101-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sened ve sair evraka yapıştırılan pulları usulüne göre iptal etmeyenlerden alınan cezanın eytâma uygulanmaması Senedât ve evrâk-ı sâireye yapıştırılan pulların mühür veyâ imzâ ve târihinin bir kısmı ile ibtâli hakkındaki karârın neşrinden mukaddem eytâma müte‘allik tanzîm olunan senedât ve evrâk-ı sâireye mevzû‘ pullar yalnız târih veyâ imzâ veyâhûd mühür ile ibtâl edilmiş olduğundan bunun için cezâ-i nakdî ahzı tarafına gidilmek haklarında gadri müstelzim olacağına mebnî o misillü eytâma müte‘allik evrâkın cezâ-i nakdîden afvı hakkında yazılan tezkire-i mecî Şûrâ-yı Devlet’e lede’l-havâle ol bâbda cereyân eden müzâkerâtı hâvî Tanzîmât Dâiresi’nden i‘tâ olunan mazbatada senedât ve evrâk-ı sâireye yapıştırılan pulların sûret-i ibtâli hakkındaki hükm-i kānûn lâyıkıyla anlaşılamamasından dolayı tefsîre lüzûm görünerek resmen i‘lâmnâme neşriyle teşrîh-i madde edilmiş olduğundan bunun neşrinden mukaddem tanzîm edilen senedât ve sâireye yapıştırılan pulların sûret-i ibtâlinin tefsîren ta‘yîn kılınan hükm-i kānûna adem-i muvâfakati beyânıyla cezâ-i nakdî ahzı tarafına gidilmek muvâfık-ı adâlet olamayacağı gibi pulların mühür veyâhûd imzâ veyâhûd târihin bir kısmı ile ibtâl olunması hakkında Düyûn-ı Umûmiye [102] İdâresi’yle hâsıl olan muvâfakat üzerine madde-i mezkûre tashîh kılınmış ve muhaffef-i cezâ olan ahkâm-ı kavânînin mâ-sebaka şâmil olacağı dahi kavâ‘id-i külliye iktizâsından bulunmuş olduğundan bu sûretle dahi tefsîren ta‘yîn eden hükme tevfîkan ibtâl edilmiş olan pullar için cezâ-i nakdî ahzına mahâl kalmamış olduğunun cevâben savb-ı mecîye iş‘ârı ve Adliye Nezâret-i celîlesine dahi teblîgāt icrâsıyla keyfiyetin gazetelerle de i‘lân ettirilmesi gösterilmiş ve mûcebince îcâbı icrâ olunmuş idiğine dâir vârid olan tezkire-i sâmîye-i sadâret-penâhî üzerine keyfiyet Dersa‘âdet hükkâm-ı kirâmıyla merâkiz-i vilâyât ve elviye-i müstakille nüvvâb-ı şer‘iyesine izbâr ve işbu tahrîrât-ı mecînin nüsah-ı kâfiyesi leffen tisyâr edilmiş olmağla birer nüshasının mülhakāt nüvvâbına tesyîrine müsâra‘at ve idârece de ol vechile mu‘âmeleye himmet buyurulması siyâkında şukka-i mecî terkīm olundu. Fî-Safer sene 305 ve fî-Teşrîn-i evvel sene 303.