İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 283 Hüküm no: 297 Orijinal metin no: [106-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evkaf-ı Hümayun Deavi Vekili Şehri Efendi’nin raporlu olması üzerine yerine dava vekillerinden Vehbi Efendi ile Maarif Nezareti Hukuk Müşaviri Subhî Bey’in vekâlet etmesi Huzûr-ı Âlî-i Fetvâ-penâhî’ye, Ma‘rûz-ı bende-i dîrîneleridir ki, Evkāf-ı Hümâyûn De‘âvî vekîli fazîletlü Şehri Efendi’nin ayağında ârızadan dolayı bir iki ay istirâhate muhtâc olduğu etibbâ tarafından beyân olunması üzerine ârızanın indifâ‘ına değin muhâkemât-ı vakfiye dûçâr-ı teahhur olmak üzere yerine kendisinin intihâbıyla da‘vâ vekîllerinden fazîletlü Vehbi Efendi tevkîl olunarak keyfiye[t]de fî 15 Muharrem sene 306 târihli tezkire ile savb-ı âlî-i fetvâ-penâhîlerine iş‘âr olunmuş idi. Efendi-yi mûmâ-ileyhin bu kere verdiği müzekkirede mûmâ-ileyh Vehbi Efendi hüsn-i temşiyet-i mesâlihe yalnızda yetişememekte olması mülâbesesiyle mûmâ-ileyhin vekâleti bâkī kalmak üzere Ma‘ârif Nezâret-i Celîlesi Hukūk Müşâviri Subhî Bey’in de vekîl ta‘yîn olunduğu ifâde olunmağla gerek mûmâ-ileyh Vehbi Efendi ve gerek mûmâ-ileyh Subhî Bey nezâretde vekîl-i resmîsi tanınmaları zımnında Dersa‘âdet Mehâkim-i Şer‘iyye rüesâsına icrâ-yı teblîgāt buyurulması husûsunun sûret-i [savb-ı] âlî-i fetvâ-penâhîlerine izbârı Meclis-i İdâre’de ifâde olunmağla icrâ-yı îcâbı bâbında emr u fermân hazret-i men-lehu’l-emrindir. Fî 17 Safer sene 306 ve fî 11 Teşrîn-i evvel sene 304. Nâzır-ı Evkāf-ı Hümâyûn Mustafa