İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 284 Hüküm no: 299 Orijinal metin no: [106-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damga nizamnamesi gereğince sened, resmi daire makbuzu ve tezkirelere yapıştırılacak pulların basılarak vilayetlere gönderildiği Ma‘rûz-ı bende-i dîrîneleridir ki, Şeref-ta‘alluk eden irâde-i seniyye-i hazret-i pâdişâhî mûcebince ahîren Damga Nizâmnâmesi’ne tezyîl edilen mevâdd-ı nizâmiyeye tevfîkan emlâk ve akārın ferâğ ve intikālini mübeyyin senedât zabıtnâmeleri ile devâir-i resmiye makbûzâtına ve mürûr ve pasaporta ve sayd-ı mâhî ve şikâr tezkirelerine yapıştırılacak pullardan lüzûmu mikdârı i‘mâl ve vilâyâta da irsâl kılındığı cihetle mezkûr pulların Dersa‘âdet’de Eylül ibtidâsından ve vilâyâtda şehr-i mezkûrun on beşinden i‘tibâren isti‘mâlleri husûsuna bi’l-istîzân irâde-i aliyye ta‘alluk eylediğinden oraca dahi hükm-i irâde-i aliyyeye tevfîk-i mu‘âmele buyurulması bâbında emr u fermân hazret-i veliyyü’l-emrindir. Fî 6 Muharrem sene 306 ve fî 31 Ağustos sene 304. Vekîl-i Nâzır-ı Umûr-ı Mâliye Agop