İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 285 Hüküm no: 300 Orijinal metin no: [106-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni Damga Resmî Kanunu gereğince mehil müddetinden sonra damgalanmak üzere getirilen evrak ve senetlerden ceza-i nakdi alınması Taraf-ı Sâmî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Nizâmen lâzım gelen resmi alınmamış olan ve Resm-i Damga Kānûn-ı Cedîdi’nin otuz altıncı maddesi mûcebince verilen üç mâh mehlin inkızâsından sonra damgalandırılmak üzere getirilen evrâk ve senedâtdan Atîk Damga Kānûnu’nun ma‘mûlün-bih olduğu zamanlarda tanzîm edilmiş olanlar hakkında atîk ve cedîd kānûnlardan kangısının ahkâmına tevfîkan mu‘âmele olunması iktizâ edeceği makām-ı nezâretden sebk eden istîzân üzerine Şûrâ-yı Devlet Tanzîmât Dâiresi’nden kaleme alınıp bâ-buyruldu-yı âlî cânib-i hazîneye teblîğ buyrulan mazbata sûretinde konturatolar ile kefâletnâmeler ve makbûz ve îrâd-ı emânet senedleri kānûn-ı atîk hükmünce resm-i nisbîye tâbi‘ iken kānûn-ı cedîd ile resm-i maktû‘a tâbi‘ edilmiş ve ber-mûceb-i kānûn damgalanmamış ve pul yapıştırılmamış olduğu hâlde birer sûretle devâir ve mevâki‘-i resmiyeye ibrâz olunan bu gibi evrâk ve senedâtdan yarım Osmanlı altınından üç Osmanlı altınına kadar cezâ-yı nakdî ahz olunması kānûn-ı cedîd-i mezkûrun yirmi ikinci maddesi ahkâmından olup binâen-aleyh bu kānûn hükmüne tevfîkan istifâsı lâzım gelen cezâ umûmiyeti i‘tibâriyle atîk kānûn mûcebince alınacak olan cezâ-i nakdîden [107] daha hafîf olmasına ve umûr-ı cezâiyede muhaffef cezâ olan mevâddın mâ-sebakına şümûlü olacağı kavâ‘id-i külliye iktizâsından bulunmasına nazaran Damga Kānûn-ı Cedîdi’nin otuz altıncı maddesi hükmünce verilmiş olan üç mâh mehlin inkızâsından sonra damgalandırılmak üzere Düyûn-ı Umûmiye İdâresi’ne getirilecek olan evrâk ve senedâtdan Atîk Damga Kānûnu’nun mer‘î olacağı vakitlerde tanzîm edilmiş olanları hakkında dahi yeni kānûn ahkâmına tevfîkan mu‘âmele olunması tabî‘i idiği gösterilmiş ve keyfiyet devâir-i sâire ve vilâyât-ı ma‘lûme ile elviye-i müstakille mutasarrıflarına ta‘mîmen bildirilmiş olduğundan mûcebince mu‘âmele-i lâzıme îfâsı husûsunda savb-ı sâmî-i dâverîlerine izbârı Düyû[n]-ı Umûmiye İdâresi’nden ifâde olunmağın ber-vech-i muharrer îfâ-yı muktezâsı bâbında emr u fermân hazret-i men-lehu’l-emrindir. Fî 20 Zilhicce sene 305 ve fî 16 Ağustos sene 304. [108. sayfa boştur]