İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 286 Hüküm no: 302 Orijinal metin no: [109-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahkemelerde şifahen tescil olunan vekaletnamelere de pul yapıştırılması İstanbul Kādılığı’na, Fazîletlü Efendim Hazretleri, Mehâkimde şifâhen tescîl olunan vekâletnâmelere onar guruşluk pul yapıştırılacağı Damga Kānûnu’na tezyîl edilen rüsûm-ı maktû‘a cedvelinde muharrer ve münderic olup mûcebince her yerde ve Bâb-ı Fetvâ devâirinde mu‘âmele cereyân etmekte bulunduğu hâlde mehâkim-i şer‘iye-i sâirede yalnız vekâletnâmelere pul yapıştırılarak şifâhen tescîl olunanlarına yapıştırılmamakta idiği haber alınmış ve bu ise hükm-i kānûna mugāyir bulunmuş olduğundan ve bilâhare pulsuz olarak görülecek mu‘âmeleden dolayı bâdîlerinden cezâ-i nakdî talebine kıyâm olunacağı derkâr bulunduğundan bahisle icrâ-yı îcâbı Düyûn-ı Umûmiye Vâridât-ı Muhassasa Müdîriyet-i Umûmiyesi’nden iş‘âr olunduğu ve mugāyir-i kānûn mu‘âmele vukū‘u tecvîz olunamayacağı cihetle zikrolunan cedvel mûcebince sâlifü’z-zikr vekâletnâmelere pul yapıştırılmasının lâzım gelenlere bi’t-tenbîh netîcesinin hazîneye bildirilmesi Mâliye Nezâret-i celîlesinden bâ-tezkire izbâr kılınmış ve hilâf-ı kānûn mu‘âmele îkā‘ı mesûliyeti dâ‘î olacağı müstağnî-yi îzâh bulunmuş olmağla ve mahâll-i âidesine ihtârât-ı mukteziye îfâ kılınarak nezâret-i müşârün-ileyhâya da ma‘lûmât i‘tâ olunmağla ba‘demâ mezkûr cedvel mûcebince îfâ-yı mu‘âmeleye himmet ve i‘tinâ ve mehâkim-i mülhaka nüvvâbına da teblîgāt icrâ buyurulması siyâkında tezkire-i senâverî terkīm kılındı. Fî 9 Receb sene 306 ve fî 28 Şubat sene 304. Şeyhülislâm Ömer Lütfi