İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 287 Hüküm no: 303 Orijinal metin no: [109-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersaadet ve bilâd-ı selâsedeki mülk gedik kayıtlarının ilgili mahkemelerce harc alınmaksızın çıkarılması Fazîletlü Efendim Hazretleri, Dersa‘âdet ve bilâd-ı selâse hudûdu dâhilinde hüccet-i şer‘iye ile ber-vech-i mülkiyet tasarruf olunur gediklerin lede’l-hâce ihrâc-ı kuyûdu zımnında âid oldukları mehâkim-i şer‘iye mürâca‘at olundukça mürâca‘at-ı vâkı‘a eşhâsa âid mevâdd-ı âdiyeden ad ile ba‘zen harc taleb olunmakta ve ba‘zen de harc alınamayacağı bilinerek sicillâta mürâca‘at olunmaksızın kayd bulunamadığı cevâbı verilmekte idiği ifâdesine dâir Evkāf-ı Hümâyûn Mahlûlât İdâresi’nden verilen müzekkire Meclis-i İdâre-i Evkāfa lede’l-havâle [110] Mahlûlât İdâresi’nden mehâkim-i mezkûreye vukū‘ bulan bu gibi mürâca‘at evkāf-ı şerîfe hukūkunu hıfz ve siyânet maksadına müstenid ve siyânet-i hukūk-ı vakf dahi cümle için lâ-büd idiğine nazaran ba‘demâ vâki‘ olacak mürâca‘atın telakkīsiyle taleb olunan kuyûdun bilâ-harc sür‘at-i mümkine ile i‘tâsı zımnında mehâkim-i mevcûde-i şer‘iye rüesâsına icrâ-yı teblîgāt olunması lüzûmu ifâde olunduğundan bahisle îfâ-yı iktizâsına mütedâir Evkāf-ı Hümâyûn Nezâret-i celîlesinden meb‘ûs tezkire Meclis-i Tedkīkāt-ı Şer‘iyye’de bi’l-mütâla‘a devâir-i resmiyeden kayd istifsârı hakkında vukū‘ bulacak mürâca‘at eşhâsa âid mevâdd-ı âdiyeden ad olunamayacağından sûret-i resmiyede mürâca‘at vukū‘unda taharriyât-ı lâzımenin icrâsıyla tebeyyün edecek ma‘lûmât-ı kaydiyenin bilâ-te’hîr iş‘ârı îcâb edeceğinin Dersa‘âdet ve bilâd-ı selâse mehâkim-i şer‘iyesine teblîğiyle nezâret-i müşârün-ileyhâya da ol vechile cevâb tastîri ifâde olunarak mûcebince iktizâsı icrâ kılınmış olmağla mahkeme-i fâzılânelerince dahi ber-minvâl-i muharrer îfâ-yı mu‘âmele ile lâzım gelenlere tavsiye-i maslahata himmet buyurulması siyâkında tezkire-i senâverî terkīm kılındı. Fî 11 Receb sene 306 ve fî 2 Mart sene 305. Şeyhülislâm Ömer Lütfi