İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 289 Hüküm no: 305 Orijinal metin no: [110-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asker tarafından verilen istidanameler ile memurlar tarafından verilen takrir ve tezkirelere yapıştırılacak pulların mikdarı Ma‘rûz-ı bende-i dîrîneleridir ki, Efrâd tarafından sırf mes[â]lih-i zâtiyeyi mutazammın verilen istid‘ânâmelere birer ve me’mûrîn cânibinden zâtiyâta dâir takdîm olunacak tekārîr ve tezâkire üçer guruşluk pul yapıştırılması fî 24 Şevval sene 302 târihli Şûrâ-yı Devlet karârı iktizâsından [111] olup ancak ma‘zûlînin me’mûrînden ad edilip edilmemesi işbu karâr-ı ahîrede mevzû‘-ı bahs edilmemiş olduğu gibi Me’mûrîn-i Mülkiye Terakkī ve Tekā‘üd Karârnâmesi’nden müstefîd olanlar da me’mûrînden ma‘dûd olarak bu miyânda ise ketebe-i aklâm ile hıdemât-ı hafîfede bulunan me’mûrîn dahi dâhil olacağına göre gerek bunların ve gerek ma‘zûlînin mesâlih-i zâtiyelerine dâir verecekleri varakalara yapıştırılması îcâb edecek pulların ta‘yîn-i derecâtı lüzûmuna dâir sebk eden arz u istîzân üzerine me’mûrînin mansûb veyâ ma‘zûl olması zâtiyâta dâir takdîm ve i‘tâ edecekleri tekārîr ve tezâkirin tagayyür-i nev‘ ve mâhiyetini istilzâm etmeyeceği cihetle karâr-ı mezkûr vechile me’mûrîn-i ma‘zûleden dahi müsted‘iyâtını tezkire ve takrîr ile arz etmek isteyenlerin üç guruşluk pul vaz‘ ve ibtâline mecbûriyeti tabî‘i olup ancak ketebe-i aklâm ile hıdemât-ı hafîfede bulunanlar tarafından takdîm ve i‘tâ olunan istid‘ânâmeler öteden beri arzuhâl şeklinde yazılmakta olup bu makūlelerin müsted‘iyâtını tezkire veyâ takrîr ile beyân ve ifâde etmesi âdet olmadığından onlar tarafından verilecek istid‘ânâmelere efrâd-ı ahâlî cânibinden i‘tâ olunan arzuhâller misillü bir guruşluk pul vaz‘ ve ibtâl olunmak lâzım geleceği Şûrâ-yı mezkûr Tanzîmât Dâiresi’nin fî 31 Mart sene 302 târihli buyruldu-yı sâmî-i cenâb-ı vekâlet-penâhî ile teblîğ buyrulan mazbatası sûretinde gösterilmiş olduğundan keyfiyetin ta‘mîmen lüzûm-ı teblîği Meclis-i Mâliye’den ifâde olunarak îcâbı icrâ kılınmağın ol bâbda emr u fermân hazret-i veliyyü’l-emrindir. Fî 13 Şa‘bân sene 305 ve fî 12 Nisan sene 304. Nâzır-ı Umûr-ı Mâliye Mahmud