İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 291 Hüküm no: 307 Orijinal metin no: [111-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memurun birden fazla vekalette bulunduğunda nasıl maaş alacağı Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Bir me’mûr her ne nâm ve sûret ile olur ise olsun velevki müte‘addid me’mûriyeti bulunsun iki ve daha ziyâde mahâlden maâş alamayacağı Tensîk-i Maâşât Karârnâmesi’nin altmış üçüncü maddesinde muharrer ise de bir me’mûrda iki vekâletin ictimâ‘ etmesinin memnû‘iyetine dâir nizâmâtda sarâhat olmadığı gibi vekâletin ta‘addüdü hâlinde dahi vekâleten orada olunan me’mûriyetlerden yalnız birisi için maâş alıp da diğerlerinden alamaması için Harcırâh Karârnâmesi’nde adem-i cevâz ve sehâhiyeti tazammun eder sarîh ve sıhhati bir işâret ve delâlet bulunamadığı cihetle bir takım müşkilât tahaddüs etmekte olduğundan me’mûrîn-i muvazzafanın vekâleten diğer iki me’mûriyete ta‘yîn olunarak bir zâtın uhdesinde üç nev‘ me’mûriyetin ictimâ‘ında melhûz olan mazarrâta mahâl kalmamak üzere ba‘demâ me’mûrîn-i muvazzafadan olanların birden ziyâde me’mûriyete tevkîl ve ta‘yîn edilmemesi için bi’l-cümle devâir ve vilâyâta teblîgāt icrâsı Şûrâ-yı Devlet karâr-ı müzâkerâtı îcâbından olarak keyfiyet her tarafa bildirilmiş olmağla Bâb-ı Vâlâ-yı Fetvâ-penâhîlerince dahi ber-mûceb-i karâr iktizâ-yı hâlde îfâsına himem-i aliyye-i meşîhat-penâhîleri derkâr buyurulmak bâbında emr u irâde hazret-i men-lehu’l-emrindir. Fî 13 Cemâziyelâhire sene 306 ve fî 2 Şubat sene 304.