İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 294 Hüküm no: 310 Orijinal metin no: [112-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsbat-ı rüşd edenlerin kendilerine teslim edilen miras mallarını kısa sürede telef etmeleri sebebiyle bu durumun önüne geçmek için tedbir alınması Ma‘rûz-ı bende-i dîrîneleridir ki, Şer‘an isbât-ı rüşd ile emvâl-i mevrûseleri kendilerine teslîm olunanların ekserîsi fıkdân-ı terbiye ve tahsîlden nâşî servet-i mevrûselerini müddet-i kalîle zarfında itlâf ile dûçâr-ı zarûriyet ve hâlet olmakta bulunduklarına ve bunlar için hükûmetçe bir tedbîr ihtiyâcı ittihâzı lâzımeden olmasına mebnî âid olduğu dâirece cereyân edecek mu‘âmelâta esâs olmak üzere isbât-ı rüşd etmek istid‘âsında bulunanların ahvâl-i şahsiyeleri evvel-emirde zâbıta ma‘rifetiyle tahkīk olunarak tanzîm olunacak raporta nazaran mu‘âmele-i lâzımenin icrâsı için Emvâl-i Eytâm Nizâmnâmesi’ne bir madde-i mahsûsa ilâvesi [113] veyâhûd diğer bir tedbîr-i münâsib ittihâzı hakkında Zabtiye Nezâret-i Behiyyesi’ne vukū‘ bulan iş‘âr üzerine Şûrâ-yı Devlet Tanzîmât Dâiresi’nden kaleme alınan mazbata Meclis-i Mahsûs-ı Vükelâ’[da] lede’l-kırâ’e hülâsa-i münderecâtı sefâhet ve tebzîrleri tahakkuk edenlerin zarardan vikāyeleri için hâkimü’ş-şer‘ tarafından hacr ile emvâl-i mevrûselerinin vasîleri ma‘rifetiyle idâre olunmasını ahkâm-ı şer‘iyeden olmasına ve bu bâbda hükkâm tarafından tahkīkāt-ı mukteziye icrâ kılınacağı derkâr bulunmasına nazaran bu husûsa dâir yeniden bir madde-i nizâmiye tanzîmine lüzûm yoğise de mesrûk ve mübezzir oldukları zâbıtaca müşâhede olunanların ahvâli makām-ı âlî-i fetvâ-penâhîlerine iş‘âr ve oraca dahi lâzım gelen mu‘âmelenin ta‘yîn ve icrâsına ihtimâm olunacağı takdîrde Zabtiye Nezâret-i Behiyyesince beyân olunan mahzûr dahi mündefi‘ olacağından bu yolda vukū‘ bulacak müşâhedâta ve tahkīkātın vaktiyle makām-ı âlî-i fetvâ-penâhîlerine ihbâr edilmesinin Zabtiye Nezâret-i Behiyyesi’ne ve nezâret-i mezkûreden vâki‘ olacak iş‘âr üzerine mu‘âmele-i mukteziyenin sür‘at-i tenfîz ve icrâsına ihtimâm olunması husûsunun dahi taraf-ı âlî-i fetvâ-penâhîlerine iş‘âr edilmesi tezekkür kılınacağından ibâret olarak bu sûret münâsib görülmekle mûcebince icrâ-yı îcâbının taraf-ı âlî-i fetvâ-penâhîleriyle Zabtiye Nezâret-i Behiyyesi’ne bildirilmesi karârlaştırılmış ve nezâret-i müşârün-ileyhâya iş‘âr-ı keyfiyet kılınmış olmağla Bâb-ı Vâlâ-yı Fetvâ-penâhîlerince de iktizâsının îfâsına himmet buyurulması bâbında emr u irâde hazret-i men-lehu’l-emrindir. Fî 25 Zilhicce sene 306, fî 10 Ağustos sene 305. Sadrıa‘zam Kâmil