İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 298 Hüküm no: 315 Orijinal metin no: [117-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memurlardan hazineyi zarara uğratan ve ihanetleri açığa çıkanlar ile bunları himaye edenlerin cezalandırılmaları Taraf-ı Vâlâ-yı Meşîhat-penâhî’[ye], Ma‘rûz-ı bende-i dîrîneleridir ki, Me’mûrînden hazîne-i devleti ızrâr ettikleri ve ihânet ve irtikâbları tebeyyün edecekler hakkında emsâline ibret-i müessire olmak üzere mücâzât-ı şedîde tertîbi lâzımeden olmasına binâen Şûrâ-yı Devlet ve sâir mehâkimce bir tarafdan vukū‘-ı iltimâsa mebnî bu misillüleri himâye edip kabâhatlerine iğmâz-ı ayn ile vazîfe-i mükellefesini ve ahkâm-ı kānûniyeyi tamamıyla îfâya dikkat etmeyenlerin mücâzât-ı şedîdeye uğradılacaklarının âmirleri tarafından iktizâ eden me’mûrîne tenbîh ve ihtâr olunması ve bi’l-cümle me’mûrînin nasb u ta‘yînlerinde erbâb-ı istikāmet ve ehliyetden olmalarına dikkatle beraber vukū‘ bulan şikâyât-ı muhikka veyâ vülât-ı izâm tarafından beyân olunan esbâb-ı mûcibe üzerine azl edilmiş sâbıkalı ve lekeli kimselerin be-tekrâr hizmet-i devlete alınamamasına i‘tinâ ve’l-hâsıl intihâb olunacak kâffe-i me’mûrînin sû-i ahlâkı ve hükûmet nazarında iktidâr ve ehliyetsizliği sâbit olanlardan olmamasına fevka’l-âde dikkat edilmesi şeref-sâdır olan irâde-i kat‘iyye-i cenâb-ı pâdişâhî muktezâ-yı âlîsinden olup keyfiyet bi’l-cümle devâire bildirilmiş olmağla taraf-ı âlî-i fetvâ-penâhîleri dahi ber-mantûk-ı emr u fermân-ı hümâyûn îfâ-yı mu‘âmelâta i‘tinâ ve dikkat buyurulması bâbında emr u irâde hazret-i men-lehu’l-emrindir. Fî 27 Şevval sene 1307 ve fî 2 Haziran sene 306. Sadrıa‘zam Kâmil