İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 299 Hüküm no: 316 Orijinal metin no: [117-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmen hak edilmediği halde satın alınarak nişan ve madalya takılmasının önüne geçilmesi Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Hâiz oldukları altın İmtiyâz madalyasını gāib ederek zâyi‘den diğer bir kıt‘asını taleb eden zevâta cânib-i mîrîden esmânı bi’l-istifâ müceddeden diğerinin i‘tâsı sûretinin usûl ittihâz olunması zîrde bazı kimesnelerin resmen hâiz olmadıkları nişân-ı âlî ve madalyaları mübâya‘a ile ta‘lîk etmekte oldukları vâsıl-ı sem‘-i âlî olduğundan bu hâlin adem-i vukū‘una dikkat edilmesi şeref-sâdır olup Mâbeyn-i Hümâyûn Başkitâbet-i celîlesinden tezkire-i husûsiye ile teblîğ olunan irâde-i seniyye-i cenâb-ı pâdişâhî iktizâ-yı âlîsinden bulunmuş ve keyfiyet devâire teblîğ edilmiş olmağla Bâb-ı Vâlâ-yı Fetvâ-penâhîlerince de îfâ-yı muktezâsına himem-i aliyye-i meşîhat-penâhîleri derkâr buyurulmak bâbında emr u irâde hazret-i men-lehu’l-emrindir. Fî 19 Rebî‘ülevvel sene 308 ve fî 21 Teşrîn-i evvel sene 306. Sadrıa‘zam Kâmil