İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 300 Hüküm no: 318 Orijinal metin no: [117-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmî dairelerin damga resmine tâbi olan makbuz senetleri ile sair evraka kanunun belirlediği usule göre pul işlemlerini yapmayan memurların cezalandırılması Ma‘rûz-ı bende-i dîrîneleridir ki, Devâir-i resmiyenin damga resmine tâbi‘ olan makbûz senedâtı ile evrâk-ı sâireye iktizâ eden pulu yapıştırmaksızın i‘tâ eden veyâ pulu yapıştırıp da hükm-i kānûna tevfîkan ibtâl etmeyen veyâhûd hadd-i nizâmîsinden dûn pul yapıştıran me’mûrların lâzım gelen cezâ-yı nakdîyi i‘tâ edeceklerine ve işbu cezâ-yı nakdînin me’mûr-ı mesûlün maâşından tevkīf olunacağına ve teferru‘âtına dâir damga kānûnunun yirmi ikinci maddesine tezyîl olunmak üzere kaleme alınan fıkarât-ı kānûniye lâyihasının hîn-i tedkīkinde tay edilmiş olan fıkra-i ahîrenin lüzûm-ı ibkāsı Düyûn-ı Umûmiye Komiserliği’nden vukū‘ bulan iş‘âr üzerine bi’l-istîzân Şûrâ-yı Devlet Tanzîmât Dâiresi’nden kaleme alınan mazbata Meclis-i Mahsûs-ı Vükelâ’da lede’l-mütâla‘a hükm-i kānûna tevfîk-i hareket etmeyen me’mûrdan alınacak cezâ-yı nakdîyi nakden verdiği hâlde maâşından kat‘ ve tevkīfi tabî‘i olmasına nazaran bunun kānûnda tasrîhine lüzûm görülemediği cihetle fıkra-i mezkûre tay edilmiş ve irâde-i seniyye dahi ol merkezde şeref-sudûr buyurulmuş olduğundan fıkra-i mezkûrenin tekrar dercine hâcet yok ise de Düyûn-ı Umûmiye Komiserliği’nden iş‘ârı vechile kānûnen lâzım gelen cezâ-yı nakdîyi vermeyen me’mûrların maâşından tevkīf olunacağının [118] me’mûrînce bilinmek için ta‘mîmen iş‘ârı münâsib olacağının tezekkür kılındığı beyân-ı âlîsiyle icrâ-yı îcâbı şeref-vârid olan 6 Eylül sene 306 târihli ve dokuz yüz kırk beş numaralı tezkire-i sâmîyede emr u iş‘âr buyurulmuş ve Meclis-i Mâliye karârı ve Muhâsebe-i Umûmiye-i Mâliye ifâdesiyle bi’l-umûm devâir-i merkeziye ile vilâyât ve elviye-i müstakilleye icrâ-yı teblîgāt kılınmış olmağla ber-mûceb-i karâr-ı âlî muktezâ-yı hâlin icrâ buyurulması bâbında emr u fermân hazret-i veliyyü’l-emrindir. Fî 18 Rebî‘ülevvel sene 308 ve fî 20 Teşrîn-i evvel sene 306. Mâliye Nâzırı Agop [119-120. sayfalar boştur] [121] Der-zemen-i Re’fet Efendizâde fazîletlü es-Seyyid İbrahim Edhem Efendi hazretleri Fî-gurreti Cumâdelûlâ sene 308.