İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 305 Hüküm no: 323 Orijinal metin no: [124-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tevatüren şahit dinlenmesi gerekli davalarda kimlerin dinleneceğinin önceden bildirilmesi İstanbul Kādılığı’na, Fazîletlü Efendim Hazretleri, Ahd-i hümâyûn-ı hazret-i pâdişâhîde tevâtür beyyinesi istimâ‘ının velî-ni‘met-i bî-minnetimiz şevket-meâb efendimiz hazretlerince tahattur buyrulamaması kable’l-istimâ‘ hâk-pây-ı âlîden istîzân ile arz-ı ma‘lûmât edilmemesinden neşet edip ba‘de-ezîn böyle tevâtüren şuhûd istimâ‘ı iktizâ ettiği hâlde isim ve şöhretleriyle kimlerin ikāme ve istimâ‘ olunacağının arz ve istîzân kılınacağı geçende selef-i senâverî tarafından takdîm olunup manzûr-ı vekāyık-ı mevfûr-ı hazret-i hilâfet-penâhî buyrulan tezkire-i cevâbîyede arz ve beyân kılınmasına binâen ba‘de-ezîn tevâtüren şuhûd istimâ‘ını muktezî bir da‘vâ vukū‘unda şuhûdün istimâ‘ından yirmi yirmibeş gün mukaddem da‘vâ neden ibâret olduğunun ve isim ve şöhretleriyle kimlerin ikāme ve istimâ‘ olunacağının atebe-i ulyâ-yı mülûkâneye arzıyla istîzân-ı keyfiyet olunması şeref-sâdır olan irâde-i seniyye-i cenâb-ı hilâfet-penâhî iktizâ-yı âlîsinden olduğu Mâbeyn-i Hümâyûn-ı Mülûkâne Başkitâbet-i celîlesinden bâ-tezkire-i resmiye teblîğ kılınmış olmağla ba‘demâ öyle bir da‘vâ vukū‘unda ber-mantûk-ı irâde-i seniyye istîzân-ı keyfiyet edilmek üzere îzâhât-ı lâzıme ile bir mâh mukaddem makām-ı muhlisîye ma‘lûmât i‘tâsına himmet ve i‘tinâ buyurulması siyâkında tezkire-i hulûsverî terkīm olundu. Fî 3 Safer sene 309 ve fî 26 Ağustos sene 1307. Şeyhülislâm Mehmed Cemaleddin