İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 305 Hüküm no: 322 Orijinal metin no: [123-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şer‘i senetlere pul yapıştırılması Taraf-ı Vâlâ-yı Fetvâ-penâhî’ye, Ma‘rûz-ı bende-i dîrîneleridir ki, Ashâbı yedine verilen senedât-ı şer‘iyeye üç guruşluk pul vaz‘ıyla hâvî olduğu işin nisbetinde olan pulun sicile vaz‘ edilmesi hakkında Düyûn-ı Umûmiye Vâridât-ı Muhassasa İdâresi’nden vukū‘ bulan iş‘ârdan bahisle bazı ifâdeyi hâvî taraf-ı vâlâ-yı meşîhat-penâhîlerinden re’sen ve te’kîden irsâl olunup Şûrâ-yı Devlet’e havâle olunan iki kıt‘a tezkire ve melfûfâtı üzere cereyân eden müzâkereyi mutazammın Tanzîmât Dâiresi’nden bi’l-i‘tâ Meclis-i Mahsûs-ı Vükelâ’da mütâla‘a edilen mazbatada bu bâbda Adliye Nezâret-i Celîlesi ve Düyûn-ı Umûmiye İdâresi Komiserliği ile icrâ kılınan muhâberât ber-tafsîl nakl ve hikâye olunduktan sonra mezkûr komiserlikden iş‘âr olunduğu vechile mehâkim-i şer‘iyece de pul sarfiyâtı tensîk ve te’mîn için tescîl-i vekâleti hâvî defter-i mahsûsuna yazılan şerhler zîrine Damga Resmî Kānûnu mûcebince onar ve taleb vukū‘unda işbu mahâlden ihrâcen ve mezkûr tescîlden bi’l-bahs verilmekte olan hüccetlere kayd sûreti i‘tibâriyle üçer guruşluk pul yapıştırılması için lâzım gelenlere icrâ-yı teblîgāt olunmasının taraf-ı âlî-i fetevâ-penâhîlerine izbârı ve Düyûn-ı Umûmiye İdâresi’ne ma‘lûmât i‘tâsının Mâliye Nezâret-i Behiyyesi’ne havâlesi ve Adliye Nezâret-i celîlesine de teblîğ-i keyfiyet edilmesi tezekkür edildiği dermeyân olunması ve sûret-i karâr mehâkim-i mezkûrece de pul sarfiyâtını tensîk ve te’mîn maksadına müstenid olup yolunda görünmesi olmağla ber-vech-i muharrer îfâ-yı mu‘âmele olunması bi’t-tensîb nezâret-i müşârün-ileyhâya icrâ-yı teblîgāt edilmekle Bâb-ı Vâlâ-yı Fetvâ-penâhîlerince de ber-minvâl-i meşrûh îcâb-ı hâlin icrâsı bâbında emr u irâde hazret-i men-lehu’l-emrindir. Fî 13 Şa‘bân sene 1308, fî 11 Mart sene 307. Sadrıa‘zam Kâmil