İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 319 Hüküm no: 340 Orijinal metin no: [131-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eshâm-ı cedide ve mübeddeleden muhavvel tahvilat-ı Osmaniye kuponlarının terekeye dahil edilmesi İstanbul Kādılığı’na, Fazîletlü Efendim Hazretleri, Mûceb-i tahrîr-i tereke miyânında zuhûr eden eshâm-ı cedîde ve mübeddeleden muhavvel tahvîlât-ı Osmâniye kuponlarının aynı nakid gibi mu‘âmele ile dâhil-i tereke edilerek taksîmini bazı verese-i kibâr arzu eylemekde ve bazıları da eshâm-ı mezkûrenin sûret-i tasarruf ve intikāline dâir olan nizâmnâme ahkâmının mefsûhiyeti hakkında emr-i resmî olmadığı beyânıyla tahvîlât-ı mezkûrenin evlâd[a]? intikāli hükm-i nizâma tâbi‘ olduğunu iddi‘â etmekte bulunduklarından bahisle istifsâr-ı mu‘âmeleyi hâvî Kütahya Niyâbeti’nden mevrûd tahrîrât üzerine sebk eden iş‘âra cevâben Mâliye Nezâret-i celîlesinden alınan tezkirede tahvîlât-ı Osmâniye konsolide ya‘ni eshâm-ı umûmiye misillü hâmiline âid evrâk-ı mütedâvileden olduğu cihetle terekâtdan zuhûr edenleri hakkında ne vechile mu‘âmele olunmakta ise tahvîlât-ı Osmâniye hakkında dahi o yolda mu‘âmele icrâsı muktezî olup eshâm-ı mezbûrenin tasarruf ve intikāl[ine] mütedâir olan nizâmın tahvîlât-ı Osmâniye hakkında cârî olup olmadığı bahsine gelince eshâm hakkında cârî olan nizâmâtın tahvîlât-ı Osmâniye’ye cihet-i ta‘alluku kalmamış olduğu izbâr olunmuş ve lede’l-havâle sûret-i iş‘ârın niyâbet-i mezkûre ile Dersa‘âdet ve bilâd-ı selâse mehâkim-i şer‘iyesine teblîği Meclis-i İdâre-i Emvâl-i Eytâm’dan ifâde olunarak îcâbı icrâ kılınmış olmağla dâire-i aliyyelerince de ona göre îfâ-yı mu‘âmeleye himmet buyurulması siyâkında tezkire-i muhlisî terkīm olundu. Fî 25 Rebî‘ülevvel sene 1311, fî 23 Eylül sene 1309. Şeyhülislâm Mehmed Cemaleddin