İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 317 Hüküm no: 339 Orijinal metin no: [131-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şer‘iyye mahkemelerinin hüccet ve tescil işlemlerinde Damga Resmî Kanunu’na göre her yerde aynı muamelemin yapılması İstanbul Kādılığı’na, Fazîletlü Efendim Hazretleri, Mehâkim-i şer‘iyede pul sarfiyâtını tensîk ve te’mîn için tescîl-i vekâleti hâvî defter-i mahsûsuna yazılan şerhler zîrine Damga Resmî Kānûnu mûcebince onar ve taleb vukū‘unda işbu mahâlden ihrâcen ve mezkûr tescîlden bi’l-bahs verilmekte olan hüccetlere kayd sûreti i‘tibâriyle üçer guruşluk yapıştırılması Şûrâ-yı Devlet ve Meclis-i Hâss-ı Vükelâ karârıyla bi’t-tensîb makām-ı senâverîye ma‘lûmât verildiği beyânıyla Hazînece de îfâ-yı muktezâsı 11 Mart sene 1307 târihli tezkire-i sâmîyede iş‘âr kılınması üzerine keyfiyet Düyûn-ı Umûmiye İdâresi Komiserliği’ne havâle olunup mezkûr komiserlikden cevâben alınan tezkirelerde Edirne ve Yemen vilâyetlerince kadîmi vechile ve gayr-ı muttarid bir sûretde mu‘âmele cereyân eylemekde olduğu misillü Üsküdar Mahkeme-i Şer‘iyyesi’nde eğer müvekkil ayrıca hüccet taleb eder ise tescîl-i vekâlete pul yapıştırılmayıp hüccete on [gu]ruşluk pul yapıştırıldığı gibi Galata Mahkemesi’nde de hem tescîle ve hemde hüccete seviyen ve ziyâdeten onar guruşluk pul ilsâk edilmekde bulunduğu tahkīkāt-ı vâkı‘adan anlaşıldığına ve bu ise muhâlif-i karâr bulunduğundan bahisle mu‘âmele-i mezkûrenin her yerde seviyen ve mutarriden te’mîn-i cereyânı zımnında iktizâsının icrâsı Düyûn-ı Umûmiye İdâresi’nin iş‘ârına atfen izbâr olunduğundan ve Meclis-i Mâliye ve Muhâsebe-i Umûmiye ifâdeleriyle ber-mûceb-i karâr icrâsı îcâbı için vilâyât-ı mezkûre mehâkimi rüesâsına icrâ-yı teblîgāt olunması Adliye Nezâret-i celîlesine yazıldığından bast ile taraf-ı hulûsverîden dahi lâzım gelenlere teblîgāt-ı mukteziye icrâ olunmasına mütedâir Mâliye Nezâret-i celîlesinden mevrûd tezkire Meclis-i Tedkīkāt-ı Şer‘iyye’ye lede’l-havâle husûs-ı mebhûsün-anh hakkında makām-ı muhlisîden sebk eden iş‘âr üzerine ahîren 13 Şa‘bân sene 1308 târihiyle vârid olan tezkire-i sâmîyede mahkeme-i şer‘iyeden tescîl-i vekâleti hâvî defter-i mahsûsuna yazılan şerhler zîrine Resm-i Damga Kānûnu mûcebince onar ve taleb vukū‘unda işbu mahâlden ihrâcen ve mezkûr tescîlden bi’l-bahs verilmekte bulunan hüccetlere kayd sûreti i‘tibâriyle üçer guruşluk pul yapıştırılması lüzûmu Şûrâ-yı Devlet Tanzîmât Dâiresi’nin Meclis-i Mahsûs-ı Vükelâ’da kırâet olunan mazbatasında dermeyân olunduğu ve ol vechile devâir-i âidesine teblîğ-i madde kılındığı beyân buyrulduğundan ber-mûceb-i iş‘âr karâr-ı mezkûra tevfîk-i mu‘âmele edilmesi lâzım geleceğinin Dersa‘âdet ve bilâd-ı selâse mehâkim-i şer‘iyesiyle merâkiz-i vilâyât ve elviye-i müstakille nüvvâb-ı kirâmına izbârı bâ-müzekkire ifâde olunarak mûcebince teblîgāt-ı umûmiye icrâ kılınmış olmağla savb-ı fazîletlerinden dahi nizâmı dâiresinde mu‘âmele-i mutarrideye i‘tinâ ve himmet buyurulması siyâkında tezkire-i senâverî terkīm kılındı. Fî 22 Zilhicce sene 1310 ve fî 24 Haziran sene 1309. Şeyhülislâm Mehmed Cemaleddin