İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 320 Hüküm no: 342 Orijinal metin no: [132-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sicill-i Nüfus’da kaydı ve ellerinde Tezkire-i Osmaniyesi olmayanlara resmi işlem yapanlara uygulanacak muamele Bâb-ı Âlî Dâire-i Umûr-ı Dâhiliye Mektûbî Kalemi Aded: 45 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Sicill-i Nüfûs’da kaydı ve yedlerinde tezkire-i Osmâniyesi olmayan kesânın nikâh ve ferâğ mu‘âmelesini icrâ ve o makūlelere me’mûriyet veyâhûd mürûr tezkiresi ve pasaport i‘tâ etmek gibi mugāyir-i nizâm ahvâle mücâseret edenler haklarında olunacak mu‘âmeleye dâir Sicill-i Nüfûs Nizâmnâmesi’nde sarâhat olmadığından bahisle bu bâbda Şûrâ-yı Devletçe bir karâr ittihâzı lüzûmuna dâir vukū‘ bulan iş‘âr üzerine şûrâ-yı mezkûr Tanzîmât Dâiresince fî 1 Ağustos sene 310 târihli buyruldu-yı âlî-i sadâret-penâhî ile tevdî‘ olunan mazbatada beyân olunan ahvâl-i kavânîn ve nizâmât ve Devlet-i Aliyye’ye muhâlif hareket demek olup bunlar hakkında ise Cezâ Kānûnnâme-i Hümâyûnu’nda ahkâm münderic olduğundan o makūle fi‘ile cesâret edenler aleyhine âid olduğu mahkemede ikāme-i da‘vâ olunmak lâzım geleceği gösterilmiş ve mûcebince îfâ-yı mu‘âmele olunması ta‘mîmen teblîğ ve iş‘âr kılınmış olduğundan taraf-ı vâlâ-yı meşîhat-penâhîlerince de ona göre îfâ-yı muktezâsına himem-i aliyye-i fetvâ-penâhîleri derkâr buyurulması bâbında emr u fermân hazret-i men-lehu’l-emrindir. Fî-gurreti Rebî‘ülâhir sene 312 ve fî 19 Eylül sene 310. Nâzır-ı Umûr-ı Dâhiliye Rıfat