İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 320 Hüküm no: 343 Orijinal metin no: [132-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersaadet ve bilad-ı selase şer‘iye mahkemeleri sicillerinin iyi korunabilmesi için kaliteli kâğıtların kullanılması Bâb-ı Fetvâ Dâire-i Meşîhat-i İslâmiye Mektûbî Kalemi Aded: 157 İstanbul Kādılığı’na, Fazîletlü Efendim Hazretleri, Dersa‘âdet ve bilâd-ı selâse mehâkim-i şer‘iyesi sicillâtının hüsn-i muhâfazası maksadıyla bâ-irâde-i seniyye-i cenâb-ı hilâfet-penâhî Bâb-ı Fetvâ’da te’sîs ve inşâ kılınan dâire-i mahsûsaya mehâkim-i mezkûre sicillât-ı atîkası celb olunarak sûret-i muntazamada yerleştirilmiş ve bunların kâğıdlarının nefâset ve metânet-i fevka’l-âdesine binâen ber-vefk-i matlûb-ı âlî ilâ âhiri’l-eyyâm muhâfazası mümkün bulunmuş olduğu hâlde birkaç seneden beri bu bâbdaki maksad-ı âlî nazar-ı teemmüle alınarak sicillât-ı mezbûrenin zaîf ve âdî evrâktan i‘mâl ettirilmiş olmasından nâşî bazıları fersûdelenip yazıları okunmaz bir hâle gelmiş ve bazı fersûde kâğıdların parçaları da kopup düşmüş olduğu gibi el-hâletü hâzihî mahkemelerce i‘mâl ettirilmekte olan sicillât bu nev‘ evrâk-ı âdiye ve zaîfeden ittihâz edildiği görülmekte olmasına mebnî ba‘demâ i‘mâl ettirilecek sicillâtın kā‘ide-i kadîme vechile alakurna ta‘bîr olunan kâğıdlardan yaptırılarak nefîs mürekkeblerle yazdırılması ve hükkâm-ı şer‘iyenin tebeddüllerinde hâkim-i lâhık tarafından sicill-i cedîd ittihâzıyla selefi sicilinin usûlen temhîr ettirilerek Dâire-i Sicillât’a teslîmi husûslarının Dersa‘âdet ve bilâd-ı selâse hükkâm-ı kirâmına tavsiye ve izbârı Sicillât-ı Şer‘iyye Dâiresi’nden bâ-müzekkire ifâde ve şu sûret Meclis-i Tedkīkāt-ı Şer‘iyyece dahi tensîb kılınarak ol sûretle lâzım gelenlere icrâ-yı vesâyâ edilmiş olmağla mahkeme-i fâzılânelerince dahi o yolda îfâ-yı mu‘âmele ile sicillâtın hüsn-i muhâfaza-i selâmeti esbâbının istikmâli emrinde be-gāyet ihtimâm ve i‘tinâ ve iktizâ edenlere teblîgāt-ı ekîde icrâ buyurulması siyâkında tezkire-i muhlisî terkīm kılındı. Fî 14 Şa‘bân sene 1312 ve fî 28 Kânûn-ı sânî sene 1310. Şeyhülislâm Mehmed Cemaleddin