İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 321 Hüküm no: 344 Orijinal metin no: [132-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Bâb Mahkemesi kâtiplerinden Mehmed Tevfik Efendi’nin maaşına zam yapılması Huzûr-ı Mekârim-nüşûr-ı Hazret-i Fetvâ-penâhî’ye Ma‘rûz-ı abd-i dâ‘î-i müsted‘îleridir ki, Sâye-i ihsân-vâye-i hazret-i hilâfet-penâhîde bu kere [133] Erzurum Mevleviyeti uhde-i acz-i udde-i abîdâneme tevcîh ve ihsân buyurulmasından dolayı farîza-i zimmet-i ubûdiyet olan ed‘iye-i hayriye-i cenâb-ı zıllullâhîye terdîfen izdiyâd-ı ömr ü ikbâl-i hazret-i fetvâ-penâhîlerini tekrar ve tezkâr etmekteyim, ancak yirmi seneden beri mütevâliyen sebk eden hıdemât-ı âcizâneme mukābil nâil olmuş olduğum kırk guruş tarîk maâşı kat‘ buyurulur ise müzâyaka-i dâ‘iyânem tezâyüd ve tekessür edeceği hâtırasıyla mesrûriyet-i mutahassıla-i kemterânem mübeddel-i me’yûsiyet olacağından el-ihsân bi’t-tamam kā‘ide-i hasenesine tevfîkan maâş-ı mezkûrun İstanbul Bâb Mahkemesi Kâtib-i Sânîliği’ne mahsûs yüz doksan beş guruş maâş-ı âcizâneme zam ve ilâve buyurulması husûsuna müsâ‘ade-i celîle-i hazret-i meşîhat-penâhîleri erzân ve şâyân buyurulmak bâbında ve kātıbe-i ahvâlde emr u fermân hazret-i veliyyü’l-emrindir. Fî 23 Zilka‘de sene 312 ve fî 6 Mayıs sene 311. El-Abdü’d-dâ‘î Hoca Hüsnü Efendizâde es-Seyyid Mehmed Tevfik b. Hüseyin Hüsnü Kıdem-i hizmeti ve ehliyeti cihetle uhdesindeki tarîk maâşının el-yevm iştigāl eylediği Bâb Mahkemesi Kâtib-i Sânîlik maâşına zammı tensîb olunmağla kalemce mu‘âmele-i lâzımenin icrâsı. Fî 23 Zilka‘de sene 1311