İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 326 Hüküm no: 354 Orijinal metin no: [137-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mürur tezkiresi alacak memurlara bağlı oldukları dairenin nâzır, reis veya müdürleri tarafından ilmühaber verilmesi Bâb-ı Âlî Dâire-i Umûr-ı Dâhiliye Mektûbî Kalemi Aded: 16 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Mürûr Nizâmnâmesi’nin dokuzuncu maddesi mûcebince mürûr tezkiresi istihsâli için me’mûrînin mensûb oldukları dâire nâzır veyâ reisi ve müdîrinden me’hûz birer ilmühaber ibrâz etmeleri meşrût olduğu hâlde mürûr tezkiresi istihsâli zımnında mürâca‘at etmekte olan me’mûrîn mensûb oldukları devâirden ilmühaber i‘tâsında tereddüd edildiği beyânıyla mahallât ilmühaberi ibrâz etmekte oldukları ve bu misillü me’mûrîn hakkında mahalle ilmühaberleri üzerine bi’t-tab‘ mu‘âmele icrâ edilememesi sadâ‘ ve şikâyâtı mûceb olmakta bulunduğu cihetle ba‘de-ezîn dâire-i celîle-i fetvâ-penâhîlerince de nizâmnâme-i mezkûr hükmüne tevfîkan mu‘âmele îfâsı lüzûmunun îcâb edenlere emr ü tenbîh buyurulması Sicill-i Nüfûs İdâre-i Umûmiye’si ifâdesiyle ma‘rûzdur, ol bâbda emr u fermân hazret-i men-lehu’l-emrindir. Fî 26 Muharrem sene 317 ve fî 24 Mayıs sene 315. Nâzır-ı Umûr-ı Mâliye Memduh