İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 326 Hüküm no: 355 Orijinal metin no: [137-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daire nâzır ve reislerinin Bâbıâlî’ye yazdıkları tezkirelere mütalaalarını da yazmaları gerektiği Bâb-ı Âlî Dâire-i Sadâret-i Uzmâ Mektûbî Kalemi Aded: 231 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Bi’l-cümle nüzzâr ve rüesâ-yı devâirin nezâret ve dâirelerine âid mesâlih hakkında Bâb-ı Âlî’ye tezkire tastîr ettikleri vakit tezkireye mesâlih-i mezkûreye dâir olan mütâla‘ayı dahi derc ve tahrîr etmeleri usûlü bâ-irâde-i seniyye-i mülûkâne müttehaz olduğu hâlde bir müddetdir bu usûle ri‘âyet edilmemekde olması maslahatan tecvîz olunamamak tabî‘î bulunduğundan kâffe-i nüzzâr ve rüesâ-yı devâir tarafından ber-minvâl-i meşrûh nezâret ve dâirelerine müte‘allik umûra dâir makām-ı senâverîye tezkire yazıldığı zaman [138] umûr-ı mezkûre hakkındaki mütâla‘a-i mahsûsalarının dahi ilâveten münderecât edilmesi usûlüne ba‘de-ezîn tamamıyla i‘tinâ ve ri‘âyet olunması şeref-sudûr buyrulan irâde-i kat‘iyye-i cenâb-ı hilâfet-penâhî iktizâ-yı celîlinden bulunduğu ve hâk-pây-ı şâhâneye takdîm kılınacak tezâkir devâir miyânında nüzzâr ve rüesâ-yı devâirin mütâla‘a-i zâtiyelerini şâmil olmayanlar bulunduğu takdîrce bunların hemen iâde buyrulacağı Mâbeyn-i Hümâyûn-ı Mülûkâne Başkitâbet-i celîlesinden bâ-tezkire-i husûsiye iş‘âr ve emr u fermân-ı hümâyûn-ı şâhâne mantûk-ı münîfi umûm devâire izbâr kılınmış olmağla Bâb-ı Vâlâ-yı Meşîhat-penâhîlerince de ber-minvâl-i muharrer ilâveten mütâla‘âta i‘tinâ ve dikkat buyurulması bâbında emr u irâde hazret-i men-lehu’l-emrindir. Fî 16 Şevval sene 1316, fî 15 Şubat sene 314. Sadrıa‘zam Rıfat