İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 327 Hüküm no: 356 Orijinal metin no: [138-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sicill-i Nüfus’da yer alan yaş, isim, doğum, sanat ve sıfat kayıtları tashihlerin nasıl yapılacağı Bâb-ı Âlî Dâire-i Umûr-ı Dâhiliye Mektûbî Kalemi Aded: 14 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Sin ve isim ve mevlîd ve san‘at gibi sicill-i nüfûsa müte‘allik tashîh-i kuyûd mu‘âmelâtının evvel-emirde Şehremâneti Meclisince ve ba‘dehû Şûrâ-yı Devletçe tedkīki karâr-ı âlî iktizâsından ise de bunlardan san‘at ve sıfât gibi her zaman kābil-i tahavvül ve tagayyür olan bir hâlin tashîhi için o yolda mu‘âmele îfâsı ashâbının sızlanmalarını mûceb olmakta bulunduğundan bahisle san‘atı tebeddül eden esnâfın ve san‘at ve sıfâtına âid tashîhâtın esnâf kethudâlıklarından ve san‘atı tebeddül eyleyen me’mûrînin mensûb oldukları dâirelerinden getirecekleri ilmühaberler üzerine Sicill-i Nüfûs İdâre-i Umûmiyesince tashîh-i kaydlarında usûl ittihâzı hakkında sebk eden istîzân üzerine san‘at ve sıfât dâimâ tagayyür olduğu cihetle bunların karâr-ı mezkûra tevfîkan tashîhi ashâbı hakkında su‘ûbeti mûceb olacağından sin ve isim ve mevlîd tashîhi maddesi kemâ-kân Şehremâneti Meclisince ve Şûrâ-yı Devletçe tedkīk olunmak üzere san‘at ve sıfâta dâir tashîhâtın idâre-i mezkûrece icrâsı 1 Ağustos sene 310 târihli buyruldu-yı sâmî ile teblîğ buyrulan Şûrâ-yı Devlet Tanzîmât Dâiresi mazbatasında gösterildiği gibi Sicill-i Nüfûs’da mukayyed olmayan ve pederleri vefât etmiş olan müvelledâtdan birkaç yaşına kadar cezâ-yı nakdî alınmaması lâzım geleceğine ve pederleri ber-hayat olan sıgārın kaç yaşına vâsıl oluncaya kadar pederlerinin cezâ-yı nakdî i‘tâsıyla mükellef olacaklarına dâir mukarrerât-ı mevcûde de sarâhat olmadığı ve beylik ve efendilik ve ağalık gibi unvânlarla pederi ber-hayat iken müteveffâ yazılmış veyâhûd vefât etmiş olduğu hâlde ber-hayat gösterilmiş olmasından dolayı icrâsı taleb olunan tashîhâtın ne sûretle icrâ edileceğine dâir dahi sarâhat-i nizâmiye ve karâr bulunmadığı cihetle bunların isim ve müvelled tashîhi gibi Şehremâneti Meclisince ve Şûrâ-yı Devletçe tedkīk olunduktan sonra mı yoksa san‘at ve sıfât tashîhi misillü mensûb oldukları mahallerden getirecekleri ilmühaberler ve şehâdetnâmeler üzerine doğrudan doğruya idâre-i mezkûrece mi icrâsı lâzım geleceğinin ve sâlifü’z-zikr cezâ-yı nakdîlerin dahi sûret-i istifâsının lüzûm-ı ta‘yînine dâir vâki‘ olan istîzâna binâen bâ-buyruldu-yı âlî teblîğ buyrulan şûrâ-yı mezkûr Tanzîmât Dâiresi mazbatasında pederleri vefât etmiş olan müvelledât kimsesiz bulundukları hâlde sinn-i bulûğa vusûllerine kadar bunlardan cezâ-yı nakdî alınmaması ve pederleri ber-hayat olan sıgārın senesi tecâvüz ettikten sonra her ne vakit olur ise olsun pederlerinin cezâ-yı nakdî ile mükellef tutulması ve beylik ve efendilik ve ağalık gibi unvânlarla pederi ber-hayat iken müteveffâ yazılmış veyâhûd vefât etmiş olduğu hâlde ber-hayat gösterilmiş olmasından dolayı taleb olunan tashîhâtın mensûb oldukları mahallerden getirilecek ilmühaber ve şehâdetnâmeler üzerine Nüfûs İdâresince tahkīkāt-ı kâfiye icrâ olunduktan sonra tashîhât-ı lâzımenin icrâsı beyân olunmasına mebnî o vechile mu‘âmele edilmekde ise de san‘at ve unvâna müte‘allik tashîhât için mürâca‘at edenlere mensûb oldukları devâirden ilmühaber i‘tâsı husûsunda tereddüd edildiği ashâbı tarafından ifâde ve bu bâbda bazı nüfûs nâzırları tarafından da istifsâr-ı keyfiyet edilmekde olduğundan mezkûr mukarrerât ahkâmına tevfîk-i mu‘âmele olunması lüzûmunun devâir-i merkeziye ile bi’l-cümle vilâyât ve elviye-i müstakilleye iş‘ârı Sicill-i Nüfûs İdâre-i Umûmiyesi’nden ifâde olunarak îcâbı icrâ edilmişdir. Taraf-ı âlî-i meşîhat-penâhîlerince de ona göre îfâ-yı mu‘âmele edilmek üzere lâzım gelenlere teblîgāt icrâsına [139] müsâ‘ade-i celîle-i cenâb-ı fetvâ-penâhîleri sezâvâr buyurulmak bâbında emr u fermân hazret-i men-lehu’l-emrindir. Fî 22 Muharrem sene 317 ve fî 20 Mayıs sene 315. Nâzır-ı Umûr-ı Dâhiliye Memduh