İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 333 Hüküm no: 361 Orijinal metin no: [141-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memur ve şahıslardaki vergi alacaklarının tahsili için yapılan hacizlerle ilgili davalarda dikkat edilecek hususlar Bâb-ı Fetvâ Dâire-i Meşîhat-i İslâmiye Mektûbî Kalemi Aded: 1 İstanbul Kādılığı’na, Semâhatlü Efendim Hazretleri, Gerek me’mûrîn ve gerek eşhâs zimmetlerindeki matlûbât-ı rüsûmiyenin te’mîn-i istifâsı için ale’l-usûl hacz edilen emvâl-i gayr-ı menkūle haklarında mahzâ matlûbât-ı emîriyenin istîfasını işkâl etmek garazıyla eşhâs-ı sâlise taraflarından mehâkim-i şer‘iyeye mürâca‘atla ikāme edilen mübâya‘a ya nâm-ı müste‘âr yâhûd muvâza‘a da‘vâları hakkında şuhûd-ı şahsiye istimâ‘ıyla emlâk-i mahcûzenin şahs-ı âhara âidiyetine dâir i‘lâmât i‘tâsı hukūk-ı hazînenin ziyâ‘ını müntic olacağından böyle devâir-i resmiye cânibinden mahcûz emlâk hakkında ikāme olunacak bu gibi istihkāk da‘vâlarının istimâ‘ından evvel mahcûz olup olmadığının kaydına mürâca‘atla tedkīk edilmesi ve mahcûz ise sübût-ı da‘vâ için emlâk-ı sırfe hakkındaki nizâmnâme ahkâmına tevfîkan mutlaka sened-i resmî aranılması husûsunun usûl ittihâzı lüzûmuna dâir Rüsûmât Emânet-i celîlesinden vârid olan tezkirenin leffiyle iktizâ-yı hâlin îfâsını müş‘ir vürûd eden tezkire-i sâmîye-i sadâret-penâhî Meclis-i Tedkīkāt-ı Şer‘iyye’ye lede’l-havâle bu misillü mesâilde mutabassırâne hareket olunarak usûl-ı meşrû‘â dâiresinde îfâ-yı mu‘âmele ile hukūk-ı hazînenin muhâfazasına dikkat ve i‘tinâ olunması husûsunun ta‘mîmen mehâkim-i şer‘iyeye iş‘ârı ifâde olunarak merâkiz-i vilâyât ve elviye-i müstakille niyâbet-i şer‘iyelerine muharrerât tastîr ve mülhakāta teblîğ olunmak üzere işbu tahrîrâtın nüsah-ı kâfiyesi tesyîr edilmiş olmağla ol vechile îfâ-yı mu‘âmeleye ihtimâm ü dikkat ve nüsah-ı melfûfenin îcâb edenlere irsâline müsâra‘at olunması siyâkında şukka-i senâverî terkīmine ibtidâr olundu efendim. Fî 16 Muharrem sene 1318 ve fî 2 Mayıs sene 1316. Şeyhülislâm Mehmed Cemaleddin