İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 334 Hüküm no: 363 Orijinal metin no: [141-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şer‘iyye ve hukuk mahkemelerine müracaat eden eytâm ve nisvana ait bin kuruştan az olan ilam ve hüccetlerin muhacirin iane pulundan istisna tutulması Bâb-ı Fetvâ İlmiye Muhâsebesi Aded: - Mâliye Nezâret-i celîlesinin 10 Ağustos sene 316 târihli tezkiresinin sûretidir. Mehâkim-i şer‘iyeye mürâca‘at eden aceze-i eytâm ve nisvân hakkında bir mu‘âmele-i istisnâiye olmak üzere bin guruş ve ondan dûn mebâliği hâvî hüccetler ile i‘lâmât-ı şer‘iyenin muhâcirîn iâne pulundan istisnâsı mukarrer olduğu gibi mehâkim-i hukūkiyeden bin guruşa kadar sâdır ve ekseriyetle acezeye âid bulunan i‘lâmât dahi mezkûr iâne pulundan müstesnâ tutulup bin guruşdan yukarı i‘lâmât-ı hukūkiyeye ta‘rife mûcebince on guruşluk pul yapıştırılması münâsib olacağından ol vechile îfâ-yı muktezâsı tezekkür olunduğu Şûrâ-yı Devlet Mülkiye Dâiresi’nden bâ-mazbata ifâde ve inbâ ve Adliye Nezâret-i celîlesine de teblîgāt icrâ kılındığı şeref-vârid olan 17 Temmuz sene 316 târih ve bin yedi yüz elli üç numaralı tezkire-i sâmîyede emr ve beyân buyurulmuş ve ber-mûceb-i emr-i sâmî îfâ-yı mu‘âmele olunması Muhâsebe-i Umûmiye-i Mâliye ifâdesiyle me’mûrîn-i Mâliye’ye teblîğ edilmiş olmağla oraca da ona göre icrâ-yı icâbı bâbında. Aslına mutâbıkdır. Fî 24 Ağustos sene 316. (Müdîr-i Muhâsebe-i İlmiye Rakım)