İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 335 Hüküm no: 364 Orijinal metin no: [141-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musevî Karayî cemaatinin evlilik ve boşanma gibi mezheplerine ait işlerini cemaatbaşıları marifetiyle icra etmeleri Bâb-ı Âlî Dâire-i Umûr-ı Dâhiliye Mektûbî Kalemi Aded: 34 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Musevî Karayî Cemâ‘ati’nin akd ve fesh-i nikâh misillü umûr-ı mezhebiyelerinin tâife-i merkūm cemâ‘atbaşıları ma‘rifetiyle icrâsı hakkındaki [142] hükm-i fermân-ı âlînin te’mîn-i muhâfazası husûsunun taht-ı karâra alınması istid‘âsını hâvî Karayî Cemâ‘atbaşılığı tarafından vukū‘ bulan istid‘â ve Adliye ve Mezâhib Nezâret-i Celîlesiyle cereyân eden muhâbere üzerine Şûrâ-yı Devlet-i Mülkiye Dâiresi’nden i‘tâ olunan mazbatada bu bâbda Dîvân-ı Hümâyûn Kalemi’nden sûretleri tevdî‘ edilen ferâmîn-i âliye münderecât-ı münîfesine ve tedkīkāt-ı vâkı‘aya nazaran memâlik-i şâhânede mütemekkin Karayî tâifesinin âyinleri ayrı bulunduğu ve gerek bayram ve gerek usûl-ı nikâhları diğer Yahûdî tâifesine müşâbih olmadığı ve kendilerinin nüfûs defterinde kaydları başka olduğu ve şu hâlde tâife-i merkūme cemâ‘atbaşısının müstakillen mühür isti‘mâli Yahûd tâifesinin usûl ve âyinine milletçe bir gûne mazarrât ve halel îrâs etmeyeceği tebeyyün ederek bunlardan taşraya gidenlere tezkire alıvermek ve sâire misillü umûr-ı vâkı‘alarında kullanılmak üzere mezkûr Karayî tâifesi cemâ‘atbaşısı nâmına olarak ayrıca mühür isti‘mâline evvelce ruhsat i‘tâ buyrulduğu anlaşılıp binâen-aleyh cemâ‘atbaşı tarafından mührün yalnız taşraya giden Karayî tâifesine tezkire alıvermek gibi husûsâtda değil belki tâife-i merkūmenin sâir umûr-ı vâkı‘alarında ya‘ni akd ve fesh-i nikâh misillü mu‘âmelât-ı mezhebiyelerinde dahi isti‘mâli ve bunun âid olduğu devâirce kabûlü ve tasdîki tabî‘î bulunduğu ve bu sûret mültezim-i âlî olan mazbûtiyet-i ahvâl ve idâreyi de müeddî olacağı tezekkür kılındığı ifâde edilerek nezâret-i müşârün-ileyhâya teblîgāt icrâ kılınndığı bâ-tezkire-i sâmîye-i sadâret-penâhî izbâr ve nezâret-i âcizîce de Sicill-i Nüfûs İdâre-i Umûmiyesi ifâdesiyle keyfiyet îcâb eden devâire teblîğ ve iş‘âr kılındığının arzına ibtidâr olundu. Ol bâbda emr u fermân hazret-i men-lehu’l-emrindir. Fî 9 Cemâziyelevvel sene 318 ve fî 22 Ağustos sene 316. Nâzır-ı Umûr-ı Dâhiliye Memduh