Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 562 Hüküm no: 685 Orijinal metin no: [120a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Ali’nin menzilini Mehmed b. Kasım’a satması Mahmiye-i İstanbul’da Ördek Kasab mahallesi sâkinelerinden olup zâtını ma‘rifet-i şer‘iyye ile ârifân imâm Mahmud Efendi b. Hüsnü ve Müezzin Mustafa Halîfe b. İbrahim nâm kimesneler ta‘rîfleri ile mu‘arrefe olan Hatice bt. Ali nâm hâtun meclis-i şer‘-i şerîfde mahmiye-i mezbûrede Çukur mahallesinde sâkin bâ‘isü hâze’l-kitâb Mehmed b. Kasım nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan mahalle-i mezbûre câmi‘-i şerîfine meşrûta vakıf menzil ve bir tarafdan imâma meşrûta vakıf menzil ve ba‘zan Mustafa Efendi vakfı olan menzil ve bir tarafdan taşçı Ali Çelebi odaları ve bir tarafdan tarîk-i âm ile mahdûd hâriciyyesinde fevkānî iki bâb oda ve bir sofa ve tahtânî bir ahır ve dâhiliyyesinde bir bâb oda ve üç sofa ve bir su kuyusu ve bahçeyi müştemil mülk menzilimi cümle tevâbi‘ ve levâhıkı ve kâffe-i hukūk ve merâfıkı ile mezbûr Mehmed tarafından îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile dört yüz esedî guruşa bey‘ ve teslîm ol dahi ber vech-i muharrer iştirâ ve tesellüm ve kabûl ettiğinden sonra semeni olan meblağ-ı mezbûr dört yüz esedî guruşu mezbûr Mehmed yedinden tamâmen ahz u kabz eyledim min ba‘d menzil-i mahdûd-ı mezkûr mezbûr Mehmed’in mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mustafa b. Hızır, Ali b. Mustafa, İbrahim Çelebi b. Ahmed, Ahmed b. Mustafa.