Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 561 Hüküm no: 684 Orijinal metin no: [119b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arutin v. Kirkor’un fırın hesapları ve zimmetinin ibrâ edilmesi Ekmekçi tâifesinden olup Havâss-ı Aliyye kazâsına tâbi‘ kasaba-i Südlüce’de vâki‘ merhûm Dâmâd Mustafa Efendi kurbunda müste’cirler olan Haçuk v. Baron ve Arakil v. Hazir ve Patos v. Sertac nâm zimmîler meclis-i şer‘-i şerîf-i enverde şerîkimiz ve destgâhdârları olan işbu bâ‘isü’l-vesîka Arutin v. Kirkor muvâcehesinde her biri ikrâr-ı tâm ve takrîr-i kelâm [edip] mezbûr Arutin yedinde bey‘ eylediği ekmek bahâsından seksen bin dokuz yüz akçe müctemi‘ olmuşdur deyû bundan akdem meblağ-ı mezbûru merkūmdan taleb ve da‘vâ eylediğimizde beynimizde ba‘de’n-nizâ‘ muhâsebe görüldükde mezbûr Arutin meblağ-ı mezbûrun mikdâr-ı ma‘lûmunu nakdiyle edâ ve teslîm ve müfredât defteri mûcebince zimem-i nâs olan meblağları için bizim râzı olduğumuz medyûnlar üzerine havâle-i sahîha ile bizi ihâle ve tevkîl biz dahi istîfâ ve kabz ve kabûl etmekle ba‘de küllî hesâb meblağ-ı mezbûr sekiz bin dokuz yüz akçeden ve beynimizde ma‘lûm fırın sermâyesi zararından mezbûr Arutin yedinde ve zimmetinde ancak sekiz bin akçe bâkī kalmışdı hâlâ merkūm Arutin meblağ-ı bâkī-i mezbûr sekiz bin akçeyi dahi bizlere edâ ve teslîm biz dahi yedinden ahz u kabz eyledik min ba‘d meblağ-ı mezbûr sekiz bin dokuz yüz akçeden ve mârrü’z-zikr sermâye noksânından ve bi’l-cümle târih-i kitâba gelince mezbûr Arutin yedinde ve zimmetinde bir akçe ve bir habbe hakkım bâkī kalmamışdır ve mezbûrun yedine verilen defterde mastûr olup bizim kabûl etmediğimiz mecmû‘u on beş bin dört yüz seksen akçeden müteferrika mezbûr Arutin’in malı ve hakkı olup bizim anda alâka [ve] medhalimiz yoktur dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mustafa Çelebi Kethüdâ-yı muhzırân, İbrahim Çelebi b. Ahmed, Hasan b. ( ), Mehmed b. İdris.