İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 336 Hüküm no: 366 Orijinal metin no: [142-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memuriyet ve maaş zammı evrakına iskan-ı muhacirin masraflarına karşılık olmak üzere çıkarılan puldan yapıştırılması Bâb-ı Fetvâ İlmiye Muhâsebesi Aded: - Mâliye Nezâreti’nin fî 27 Şubat sene 316 târihli bin yüz elli sekiz numaralı tezkiresinin sûretidir. Muhâcirîn mesârifine karşılık olmak üzere ihdâs olunup ahîren bâ-irâde-i seniyye-i hazret-i pâdişâhî ta‘dîl kılınmış olan pul ta‘rifnâmesinin beşinci sahîfesinde muharrer me’mûriyet ve zamm-ı maâş evrâkına yüzde bir nisbetinde ilsâk olunacak pulun sûret-i ilsâkı bazı tarafdan istifsâr olunmasına mebnî gerek mücerreden ve gerek zammıyla beraber bin guruş ve ondan ziyâde maâşa nâil olan bi’l-umûm me’mûrînin tevcîh-i me’mûriyet ve zamm-ı maâşdan sonra tâm olarak işleyip alacakları ilk maâşlarından bir def‘aya mahsûs olmak üzere yüzde bir nisbetinde pul alınması muktezî olup bunun da me’mûriyetleri[ni] müş‘ir olan tezkire ve tahrîrât ve müzekkire gibi evrâka ilsâkı müte‘assir olduğundan bu makūle bin ve daha ziyâde maâşlı bir me’mûriyete veyâhûd ma‘a zamm-ı maâş mecmû‘u binden dûn olmamak şartıyla her kaç guruş olursa olsun zamm-ı maâşa nâil olan me’mûrînden yüzde bir nisbetinde alınacak pulun me’mûrîn-i mûmâ-ileyhimin ber-vech-i muharrer ilk maâşlarının ahzını mübeyyin tanzîm ve i‘tâ edecekleri senedlere nisbî puldan başka olarak ilsâk ettirilmesi mazbûtiyeti mûceb olacağından ol vechile îfâ-yı mu‘âmele olunması ve vilâyâtda bulunan me’mûrîn ve müstahdemîn hakkında mahallerince o yolda mu‘âmele icrâ olunmak ve bundan dolayı kaç guruşluk pul alınmak îcâb edeceğinin me’mûriyet ve zamm-ı maâşı hâvî yazılacak muharrerât-ı resmiyeye derci lâzım geleceğinin ta‘mîmi devâir-i merkeziye ve taşra me’mûrîn-i mâliyesine teblîği Muhâsebe-i Umûmiye-i Mâliye’den ifâde kılınmış olmağın ol bâbda. Aslına mutâbıkdır. Fî 27 Mart sene 317. (Muhâsebe-i Umûmiye)