İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 336 Hüküm no: 365 Orijinal metin no: [142-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tercüme-i hal varakalarıyla evrak-ı müsbitesinin iskan-ı muhacirin masraflarana karşılık olmak üzere çıkarılan pula tâbi olmadığı Nezâret-i Umûr-ı Mâliye Muhâsebe-i Umûmiye Aded: 37 Ma‘rûz-ı bende-i dîrîneleridir ki, Mine’l-kadîm üç guruşluk damga pulu yapıştırılmakta olan tercüme-i hâl varakalarıyla evrâk-ı müsbitesinin iskân-ı muhâcirîn mesârifine karşılık olmak üzere ihdâs olunan pula tâbi‘ olup olmadığı hakkında vâki‘ olan istifsâr üzerine mezkûr pullara mahsûs cedvelde mevcûd olmayan evrâk ve senedât iâne pulundan istisnâ edilmiş olduğundan sâlifü’z-zikr tercüme-i hâl varakalarıyla teferru‘âtına dahi iâne pulu ilsâk olunmayacağının tezekkür olunduğu Şûrâ-yı Devlet Mülkiye Dâiresi’nden bâ-mazbata inbâ ve îcâbı icrâ kılındığı şeref-vârid olan fî 22 Mart sene 316 târih ve iki yüz doksan bir numaralı tezkire-i sâmîyem emr u irâde buyurulmuş ve keyfiyet Muhâsebe-i Umûmiye ifâdesiyle ta‘mîmen her tarafa teblîğ edilmiş olmağla münderecâtına tevfîkan îfâ-yı mu‘âmele buyurulması bâbında emr u fermân hazret-i veliyyü’l-emrindir. Fî 22 Zilhicce sene 317 ve fî 9 Nisan sene 316. Mâliye Nâzırı Reşad