İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 338 Hüküm no: 368 Orijinal metin no: [143-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Postahanelere gelen resmi posta paketlerinin dairelerce teslim alınmasının sağlanması Bâb-ı Âlî Dâire-i Sadâret-i Uzmâ Mektûbî Kalemi Aded: 76 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Taşradan vürûd eden resmî posta paketlerinin vakt ü zamanıyla aldırılması lüzûmu devâire bildirildiği hâlde yine bir hayli resmî posta paketlerinin üç aydan beri postahânede kalarak muhâfaza ve mu‘âmele-i hesâbiyelerince su‘ûbet çekilmekde olduğu, dört hafta zarfında taleb ve ahz olunmayan paketlerin mahreclerine i‘âdeleri muktezî bulunduğu Posta ve Telgraf Nezâret-i Behiyyesi’nin sûret-i mürâca‘at ve istifsârından anlaşılıp vâkı‘an müddet-i mu‘ayyenesi zarfında alınmayan gayr-ı resmî posta paketleri ale’l-usûl mahallerine iâde olunmakta ise de bunların ücretleri ashâbından istifâ edilmekde olup şu usûlün resmî posta paketlerine de tatbîki takdîrinde devâir-i resmiyece dahi ücret i‘tâsı gibi gayr-ı câiz bir hâle sebeb verileceğinden buna mahâl kalmamak üzere ba‘de-ezîn taşradan gelecek resmî posta paketlerinin teblîğ ilmühaberleri vürûdunda ahz olunarak bilâ-mûceb postahânede kalmaması lüzûmu Posta Komisyonu Riyâset-i celîlesinin iş‘ârı üzerine bi’l-umûm devâire teblîğ olunmağla nezâret-i celîlelerince de ona göre iktizâsının îfâsı bâbında emr u irâde hazret-i men-lehu’l-emrindir. Fî 22 Rebî‘ülevvel sene 320, fî 15 Haziran sene 318. Sadrıa‘zam Said