İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 339 Hüküm no: 369 Orijinal metin no: [143-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferağ ve intikal muamelelerinden alınmakta olan harcların yeniden düzenlenmesi Bâb-ı Âlî Dâire-i Meşîhat-i İslâmiye Mektûbî Kalemi Aded: 9 İstanbul Kādılığı’na, Semâhatlü Efendim Hazretleri, Ferâğ ve intikāl mu‘âmelâtında istifâ edilmekde olan harcların ta‘dîliyle mu‘âmelâtının tensîki hakkında Defter-i Hâkānî Nezâret-i celîlesinin iş‘ârı üzerine bi’l-havâle Şûrâ-yı Devlet Mâliye Dâiresi’nden tanzîm ve Mülkiye Dâiresi’nden tezyîl olunup Meclis-i Mahsûs-ı Vükelâ’da mütâla‘a olunan mazbatada Defter-i Hâkānî İdârelerince bedel mukābilinde yâhûd bilâ-bedel ferâğ birinin uhdesinden diğerinin uhdesine geçirilecek bi’l-umûm arâzî-i emîriye ve mevkūfe ve emlâk ve musakkafât ve müstegallât-ı vakfiye ve gedikler ile mâ-i lezîzden kıymetlerinin binde otuzu ve intikāl ve tevârüsünden binde on beşi nisbetinde harc istifâsı ve emlâkin beyne’l-verese sûret-i taksîmini mübeyyin mehâkim-i şer‘iyeden Defter-i Hâkānî İdârelerince verilmekte olan taksîm-i verâset-i mezkûreleri için mine’l-kadîm ashâbının mehâkim-i şer‘iyeye i‘tâ edegeldikleri harcların kemâ-kân ashâbı tarafından mehâkim-i şer‘iyeye i‘tâsı ve arâzî-i emîriye ve mevkūfe ve emlâk-ı sırfe ve mukāta‘alı emlâk ile musakkafât ve müstegallât-ı vakfiyenin ve bi’l-umûm gediklerin vefâen ferâğ ve terhîn ve istiğlâlinde Zirâ‘at Bankasıyla Emvâl-i Eytâm’dan istidâne edenler kemâ-kân müstesnâ olmak üzere mikdâr-ı deyn üzerinden seviyen yalnız binde beş harc alınması ve bu mu‘âmelâtın fekkinde bir gûne resm alınmayıp meccânen îfâsı ve sened-i hâkānîye rabtedilmemiş olan mahaller için ta‘rife-i müzekkirenin mevki‘-i icrâya vaz‘ından i‘tibâren beş sene zarfında mürâca‘atla sened-i resmî alanlardan yalnız varaka bahâsı ahzı ve beş senenin hitâmından sonra mürâca‘at edeceklere verilecek sened için ber-sâbık binde elli harc alınması ve arâzî-i emîriye ve mevkūfeden bir mahalle bilâ-nizâ‘ on sene tasarruf edenlere hakk-ı karârdan i‘tâ olunacak senedât için harc-ı ferâğa kıyâsen binde otuz nisbetinde resm ahzı ve ferâğ ve intikāl harclarının yüzde onu nisbetinde olarak kaydiye nâmıyla Dersa‘âdet’ce istifâ olunmakta olan resmin külliyen ilgāsı ve emlâk ve arâzînin taksîminde ve parçalara ifrâzında müceddeden verilecek senedâtdan ve mahlûlden tefvîz olunan musakkafât ve müstegallât-ı vakfiye senedâtından ve tashîh-i kayd için verilecek senedâtdan binde ve kesirde? iki ve kaydları ihrâc olunacak mahaller kıymetlerinde binde ve kesirde? bir resm ahzı ve varaka bahâsının üç sınıfa taksîmiyle Dersa‘âdet [144] ve mülhakātıyla vilâyet ve livâ merkezleri için kasabalar dâhilindeki bi’l-cümle emlâk ve arâzî ve bunların mülhakātından olan mebânî-i ticâriye ve sanâ‘iye ve sayfiyeler ile müştemilâtı için verilecek senedât ile müstesnâ evkāf mütevellîlerine verilecek senedât birinci sınıf i‘tibâr olunarak onlardan maktû‘an on guruş ve kazâ ve nevâhî merkezleri olan kasabalar dâhilindeki emlâk ve arâzî ve bunların mülhakātından olan mebânî ve müştemilâtı için verilecek senedât ikinci sınıf i‘tibâr olunup bunlardan maktû‘an yedi buçuk ve karye merkezlerindeki emlâk ve arâzî ile tevâbi‘înden olan mezâri‘ ve sâire için i‘tâ olunacak senedât üçüncü sınıf i‘tibâr edilip bunlardan maktû‘an beş guruş varaka bahâsı ahzı ve zâyi‘den verilecek senedât için yalnız âid olduğu sınıfa mahsûs varaka bahâsının istifâsı ve harcı husûsu ile bedel-i öşr ve icâre-i müeccele ve tevsî‘-i intikāl icâresiyle icâre-i zemîn ve resm-i dellâliye olarak alınmakta olan harcların ber-sâbık istifâsı ve tapu ketebesinin tavzîfinde kâtibiye nâmıyla el-yevm istifâ edilmekde bulunan harcların ahzına mahâl kalmayacağından muhâcirîne verilecek senedât ile Zirâ‘at Bankası mu‘âmelâtının herbiri için birer guruş hesâbıyla alınmakta olan kâtibiye resminin ilkāsı ve tezâyüd edecek vâridâtdan taşra kısmına zammı gösterilen bir milyon dokuz yüz kırk altı bin guruş ile merkez tahsîsâtına ilâvesi gösterilen yüz otuz dokuz bin guruşun ta‘dîlât-ı vâkı‘anın hâsıl edeceği netâyîce göre bi’l-hesâb Bâb-ı Âlî’den istîzânı lüzûmu dermeyân olunmuş ve mukarrerât-ı vâkı‘a idârece mazbûtiyet ve hazînece menfa‘atle beraber halkça suhûleti mûceb olmasıyla yolunda görülüp şu kadar ki emlâk-ı sırfeden alınması Şûrâ-yı Devletce tensîb olunan elli ve otuz ve on beş ve beş guruş bey‘ [u] şirâ ve tevârüs harclarının nısfa tenzîli ve tarafeyn beyninde senedât-ı âdiye ile bey‘ u şirâ vukū‘ bulur ve bundan dolayı bir gûne da‘vâ tahaddüs eder ise mehâkimde istimâ‘ olunmaması tensîb edilerek mûcebince îfâ-yı muktezâsı husûsuna meclis-i mezkûr karârıyla bi’l-istîzân irâde-i seniyye-i hazret-i hilâfet-penâhî şeref-müte‘allik buyrularak Adliye ve Evkāf-ı Hümâyûn ve Defter-i Hâkānî Nezâret-i Celîlelerine teblîgāt icrâ kılındığı beyânıyla Bâb-ı Fetvâca da îcâbının îfâsı taraf-ı sâmî-i sadâret-penâhîden izbâr ve mûcebince merâkiz-i vilâyât ve elviye-i müstakille niyâbet-i şer‘iyelerine teblîğ-i keyfiyet olunması Meclis-i Tedkīkāt-ı Şer‘iyyece tensîb ve ihtâr olunarak îcâbı icrâ kılınmağla ber-mantûk-ı emr ü fermân-ı hümâyûn dâire-i semûhîlerince de îfâ-yı mu‘âmeleye i‘tinâ olunması siyâkında tezkire-i senâverî terkīm olundu efendim. Fî 29 Şa‘bân sene 320 ve fî 16 Teşrîn-i sânî sene 1318. Şeyhülislâm Mehmed Cemaleddin