İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 342 Hüküm no: 371 Orijinal metin no: [145-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daire nazır ve reislerinin sadarete yazdıkları tezkirelere mütalaalarını da yazmaları gerektiği Bâb-ı Âlî Dâire-i Sadâret-i Uzmâ Mektûbî Kalemi Aded: 213 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Husûsât-ı mühimme hakkında nezâret ve sâir rüesâ-yı devâir tarafından makām-ı sadârete tastîr ve irsâl olunan tezâkirde husûsât-ı mezkûreye dâir mahallerinden vukū‘ bulan iş‘ârâtın nakl ve hikâyesiyle iktifâ edilmekde ise de bu sûret muvâfık ve münâsib olmayıp husûsât-ı mezkûreden Meclis-i Mahsûs-ı Vükelâ’da muhtâc-ı müzâkere olanları yâhûd doğrudan doğruya arzı lâzım gelenleri hakkında dâire-i müte‘allikasının ma‘lûmât-ı sâbıkası ve mütâla‘a-i mahsûsası neden ibâret ise onun dahi zikr u beyânı evvel ve âhir şeref-sudûr buyrulan irâdât-ı seniyye-i hazret-i hilâfet-penâhîye tevfîkan ve ta‘mîmen teblîğ edilmiş olduğu hâlde bazı devâirden gelen tezâkirde yine ale’l-ekser hikâye-i hâl ile iktifâ edilmekde ve bu sûret emr u fermân-ı hümâyûn-ı şâhâne hükm-i münîfine muvâfık olmamakla beraber istîzâhât ve istiş‘ârâta ve bu ise teahhurâta ve bî-vech muhâberâta sebeb olmakta bulunmasına ve nüzzâr-ı kirâmın cereyân-ı hâl ile beraber ıstıtlâ‘ât ve mütâla‘âtını bildirmeleri bu kere dahi şeref-sânih olan emr u fermân-ı hümâyûn-ı cenâb-ı pâdişâhî iktizâ-yı âlîsinden bulunmasına binâen umûm devâir-i merkeziyeye te’kîden teblîgāt icrâ kılınmağla taraf-ı âlî-i şeyhülislâmîlerince de ber-minvâl-i muharrer îfâ-yı muktezâsı bâbında emr u irâde hazret-i men-lehu’l-emrindir. Fî 8 Zilhicce sene 320, fî 3 Şubat sene 318. Sadrıa‘zam Ferid