İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 341 Hüküm no: 370 Orijinal metin no: [144-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yunan tebaasından olduğu anlaşılan Apostol v. İstematyazi’nin, varisleri tarafından başkasına intikal ettirilen akarıyla ilgili işlemlerin geçersiz olması Bâb-ı Fetvâ Dâire-i Meşîhat-i İslâmiye Mektûbî Kalemi Aded: 164 İstanbul Kādılığı’na, Semâhatlü Efendim Hazretleri, Müteveffâ Apostol v. İstematyazi’nin tâbi‘iyet-i Yunaniye’de bulunduğu mukaddemâ Hâriciye Nezâret-i Celîlesiyle Şûrâ-yı Devletçe bi’t-tedkīk tasdîk olunarak sefârete resmen teblîğ edilmiş olduğundan vârisleri tarafından İtalyalı Banker İlya Skob’a ve onun tarafından da teba‘a-i Devlet-i Aliyye’den Körükyan birâderlere ferâğ edildiği hâlde müteveffânın oğlu Yorgi’nin Kasımpaşa Mahkemesi ile Mahkeme-i Teftîş’den istihsâl edip kesb-i kat‘iyyet etmiş olan hüccet ve i‘lâm mûcebince dâire-i icrâ ma‘rifetiyle uhdesine intikāl ettirilmiş olan akārın tahliyesiyle merkūm Körükyan’a iâdesi ve merkūm Yorgi’ye ibtidâ Kasımpaşa Mahkemesi’nden verâset hücceti verilmesi babasının teba‘a-i Devlet-i Aliyye’den gösterilmesine mübtenî ise de müteveffâ-yı merkūmun Yunan tâbi‘iyetinde bulunduğu ber-minvâl-i muharrer musaddak ve Ecnebiye müte‘allik miras işine ve o miyânda akār üzerine iddi‘â-yı hukūkdan mütevellid da‘vâya bakmak mahkeme-i mezkûre ile Mahkeme-i Teftîş’in vezâifinden hâric bulunmasına binâen hükm-i vâkı‘ın icrâsı mümkün olamayacağı cihetle iktizâ-yı hâlin ibkā ve ba‘de-ezîn bu misillü de‘âvîde hükkâm-ı şer‘iye cânibinden evvel-emirde tarafeynin tâbi‘iyeti hakkında tahkīkāt îfâsına dikkat ve ihtimâm olunmasının lâzım gelenlere teblîğ olunması Meclis-i Mahsûs-ı Vükelâca tezekkür olunduğu beyânıyla icrâ-yı îcâbı bâ-tezkire-i sâmîye iş‘âr buyurulmuş olmağla ahvâl-i mümâsele de evvel be-evvel tarafeynin tedkīk-i tâbi‘iyetine i‘tinâ ve Davudpaşa ve Mahmudpaşa ve Ahî Çelebi mahkemelerine de teblîğ-i keyfiyet buyurulması siyâkında tezkire-i senâverî terkīm olundu efendim. Fî 20 Zilka‘de sene 1320 ve fî 5 Şubat sene 1318. Şeyhülislâm Mehmed Cemaleddin