İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 343 Hüküm no: 373 Orijinal metin no: [145-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamidiye Hicaz Demiryolu menfaati için ilmühaberler basılarak satılması Hamidiye Hicaz Demiryolu Komisyonu Âlîsi Aded: 566 Taraf-ı Âlî-i Meşîhat-penâhî’ye, Ma‘rûz-ı bende-i dîrîneleridir ki, Hamidiye Hicaz Demiryolu menfa‘ati için arzuhâl ve lâyiha ve merbûtâtından birer guruş iâne alınmak üzere ol mikdâr kıymeti hâiz ilmühaberler tab‘ıyla füruhtu ve bu ilmühaberleri isti‘mâl ve evrâk-ı lâzımesine ilsâk etmeyenlerden bir liradan üç liraya kadar cezâ-yı nakdî ahzı mukaddemâ bi’l-istîzân şeref-sudûr buyrulan ve ta‘mîmen teblîğ kılınan irâde-i seniyye-i hazret-i hilâfet-penâhî muktezâ-yı münîfinden olup gerçi mezkûr ilmühaberlerin tab‘ ve ihzârına değin bu bâbdaki vâridât zâyi‘ olmamak üzere evrâk-ı âideleri zahırlarına işâretle mezkûr birer guruş iânenin ahz olunması Komisyon-ı Âlî karârıyla sûret-i muvakkatede tecvîz olunmuş idiyse de bu yolda gösterilen cevâz ilmühaberlerin tab‘ ve neşri müddetine âid olup el-yevm mezkûr ilmühaberlerin mikdâr-ı kâfîsi Dersa‘âdet’de Zirâ‘at Bankası idâre-i merkeziyesinden ve taşrada mezkûr bankanın şu‘be ve sandıkları ile banka şu‘besi ve sandığı bulunmayan mahallerde mâl sandıklarında bulundurulduğu hâlde hâlâ bazı devâirce mezkûr ilmühaberler isti‘mâl olunmayıp evrâk-ı âideleleri zahrına işâretle iânenin nakden ahzına devam edildiği alınan hesâbâtdan müstebân olduğuna binâen bu bâbda iktizâ eden mu‘âmele vilâyât ve elviye-i mülhakaya teblîğ ve iş‘âr kılındığı gibi devâir veznelerince ihtiyâca kâfî ilmühaberin mezkûr banka idâre-i merkeziyesinden bi’l-mübâya‘a veznede mevcûd bulundurularak istid‘â ve lâyiha ve merbûtâtına bi-eyyi hâlin bunların ilsâk olunması ve bundan böyle mezkûr ilmühaber ilsâk olunmayıp da evrâk-ı âideleri zahrına işâretle iâne nakden alındığı hâlde hükm-i münîf-i irâde-i seniyye-i cenâb-ı hilâfet-penâhî mûcebince cezâ-yı nakdîsi olan üç liranın ilmühaber ilsâk edilmemiş evrâk üzerine mu‘âmele yürüten me’mûrlardan ahzı lâzım geleceğinin ta‘mîmen teblîği Komisyon-ı Âlîce tezekkür edilmiş olmağla icrâ-yı îcâbı bâbında emr u fermân hazret-i men-lehu’l-emrindir. Fî 28 Ramazan sene 1321 ve fî 5 Kânûn-ı evvel sene 1319. Hamidiye Hicaz Demiryolu Komisyon-ı Âlîsi Nâmına A‘zâdan Sadrıa‘zam Ferid