İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 344 Hüküm no: 374 Orijinal metin no: [146-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli vilayetleri halkından toplanması imkansız olan şahsi verginin ileri tarihe ertelenmesi Nezâret-i Umûr-ı Mâliye Mektûbî Kalemi Aded: 344 Ma‘rûz-ı bende-i dîrîneleridir ki, Vergi-yi şahsiyenin şu aralık Rumeli vilâyât-ı şâhânesi ahâlîsinden istifâsındaki imkânsızlık bedîhî ve âşikâr ve Anadolu cihetlerinde dahi birçok efrâd silâh altına alınarak Rumeli’ye sevk olunduğu cihetle oradan tahsîline teşebbüs dahi muvâfık olamayacağı derkâr bulunduğuna binâen bu verginin tarh ve tevzî‘i maddesinin ileriye ta‘lîki şeref-sâdır olan irâde-i seniyye-i hazret-i hilâfet-penâhî iktizâ-yı âlîsinden bulunduğu ve vilâyât ve elviye-i gayr-ı mülhakaya ma‘lûmât verildiği beyân-ı âlîsiyle Hazînece de ber-mantûk-ı emr u fermân-ı hümâyûn-ı şâhâne mu‘âmele-i lâzımenin îfâsı şeref-vârid olan 3 Kânûn-ı sânî sene 1319 târihli tezkire-i sâmîye-i sadâret-penâhîde emr u izbâr buyurulmuş ve keyfiyet Muhâsebe-i Umûmiye-i Mâliye ifâdesiyle devâir-i merkeziye ve bi’l-umûm me’mûrîn-i mâliyeye teblîğ edilmiş olmağla ol bâbda emr u fermân hazret-i veliyyü’l-emrindir. Fî 14 Zilka‘de sene 1321 ve fî 19 Kânûn-ı sânî sene 1319. Mâliye Nâzırı Reşad