İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 346 Hüküm no: 377 Orijinal metin no: [146-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hicaz Demiryolu masraflarına karşılık olmak üzere basılan evraktan elde edilen gelirlerin devam ettirilmesi Bâb-ı Âlî Dâire-i Umûr-ı Dâhiliye Mektûbî Kalemi Aded: 22 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Hicaz Demiryolu mesârifine karşılık olmak üzere ihdâs edilen ve evrâk-ı mahsûsa tab‘ ve füruhtu sûretiyle cibâyet olunan vâridâtın te’mîn-i istifâsı zımnında işbu evrâkı isti‘mâl etmeyenlerle evrâk-ı mezkûreye tahrîri muktezî husûsâtın evrâk-ı âdiye üzerine yazıldığına resmen muttali‘ olup da iğmâz eyleyenlerden seyyânen yarım liradan bir buçuk liraya kadar cezâ-yı [147] nakdî alınması ve bu cezâ-yı nakdîyi îfâ etmeyenler haklarında Damga Nizâmnâmesi ahkâmına göre mu‘âmele olunup müdde‘î-i umûmilerin dahi ta‘kībâta me’mûr edilmesi Komisyon-ı Âlî’nin mazbata-i ma‘rûzası üzerine şeref-sudûr buyrulan irâde-i seniyye-i cenâb-ı hilâfet-penâhî îcâb-ı âlîsinden olarak Adliye Nezâret-i Celîlesi’nden teblîgāt icrâ kılındığı fî 20 Mayıs sene 320 târihli ve sekiz yüz seksen dokuz numaralı tezkire-i sâmîye ile teblîğ buyurulmuş ve keyfiyet ta‘mîmen devâir ile vilâyât ve elviye-i gayr-ı mülhakaya iş‘âr kılınmıştır, ol bâbda emr u fermân hazret-i men-lehu’l-emrindir. Fî 24 Rebî‘ülevvel sene 322 ve fî 27 Mayıs sene 320. Nâzır-ı Umûr-ı Dâhiliye Memduh