İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 347 Hüküm no: 379 Orijinal metin no: [147-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamidiye Hicaz Demiryolu mühendislerinden Remzi Efendi’nin memuriyet mahallinden firar etmesi Hamidiye Hicaz Demiryolu Komisyon-ı Âlîsi Aded: 361 Taraf-ı Âlî-i Meşîhat-penâhî’ye, Ma‘rûz-ı bende-i dîrîneleridir ki, Hendesehâne-i Mülkî-i Şâhâne me’zûnlarından ve Hamidiye Hicaz Demiryolu Şu‘abât-ı Fenniye Riyâseti ma‘iyetine me’mûr mühendislerden olup hastalığını bahâne ederek üç gün ruhsatla me’mûriyetinden infikâk eden Mühendis Remzi Efendi’nin mahâll-i me’mûriyetine avdet etmediği gibi Portsaid’den gönderdiği mektûbda dahi hârice firâr eylediği gösterildiği riyâset-i mezkûrenin iş‘ârına atfen ser-mühendislikden bildirildiği mezkûr Demiryolu İnşâât Nezâret-i celîlesinden alınan 26 Teşrîn-i sânî sene 320 târihli telgrafnâmede izbâr olunmuş ve zikrolunan hendesehâne me’zûnlarından nısfının kur‘a keşîdesiyle bir müddet mezkûr demiryolunda istihdâmı hakkında kaleme alınıp mer‘iyyet-i ahkâmına bi’l-istîzân irâde-i seniyye-i hazret-i hilâfet-penâhî şeref-müte‘allik buyurulmuş olan karârnâme mûcebince mûmâ-ileyhin ba‘demâ hizmet-i devletde istihdâm olunmaması lâzım gelerek keyfiyet ta‘mîmen devâire teblîğ edilmiş olmağla Dâire-i İlmiyecede ona göre îfâ-yı muktezâsı bâbında emr u fermân hazret-i men-lehu’l-emrindir. Fî 12 Şevval sene 1322 ve fî 6 Kânûn-ı evvel sene 1320. Hamidiye Hicaz Demiryolu Komisyon-ı Âlîsi Nâmına A‘zâdan Sadrıa‘zam Ferid