İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 348 Hüküm no: 380 Orijinal metin no: [147-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahlulata dair tanzim olunan müzayede ve münakasa kaimelerine pul yapıştırılması Bâb-ı Âlî Dâire-i Sadâret-i Uzmâ Mektûbî Kalemi Aded: 168 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Mahlûlâta dâir tanzîm olunan müzâyede pusulalarına kānûn-ı cedîd mûcebince umûmuna mı yâhûd bir kısmına mı ne vakit ve ne yolda üçer guruşluk pul ilsâkı lâzım geleceğini müstefsir Evkāf-ı Hümâyûn Nezâret-i celîlesinin tezkire-i mahlûlesi üzerine damga resmi Tetkīk Komisyonu’ndan i‘tâ olunan mazbatada Damga Resmî Kānûnnâme-i Hümâyûn’unun dokuzuncu maddesinin yirmi birinci numarasında müzâyede ve münâkasa kāimelerine keşîde olunacak karâr-dâdelere üçer guruşluk pul ilsâk olunacağı muharrer ise de müzâyedât ve münâkasâtda ibtidâki karâr-dâdeler muvakkat olup zamâim vukū‘ buldukça ve müddet-i mu‘ayyene inkızâ etmedikçe mezkûr karâr-dâde ihâle-i evveliye mâhiyetinde kalacağı hâlbuki kānûnda münderic karâr-dâdeden maksad mu‘âmele-i intihâiye ya‘ni ihâle-i kat‘iyye karârları olduğu derkâr bulunduğuna ve bu sûret zâten [148] Hazîne-i Celîle-i Mâliye ve Düyûn-ı Umûmiye-i Osmâniye’de karârlaştırılarak keyfiyetin hazîne-i müşârün-ileyhâca vilâyâta da bildirildiği bi’t-tahkīk anlaşıldığına binâen mezkûr numaradaki karâr-dâde fıkrası ihâle-i kat‘iyye karârları sûretinde tashîh ve ta‘dîl olunmak üzere üç guruşluk damga resmi pulunun müzâyede ve münâkasa kāimelerine en sonra keşîde olunacak ihâle-i kat‘iyye karârları üzerine ilsâk ettirilmesinin usûl ittihâzı lâzım geleceği ifâde ve devâir-i merkeziyeye ta‘mîmen teblîğ-i madde edilmiş olmağla ona göre icrâ-yı îcâbı bâbında emr u irâde hazret-i men-lehu’l-emrindir. Fî 18 Zilhicce sene 322 ve fî 10 Şubat sene 320. Sadrıa‘zam Ferid