Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 563 Hüküm no: 687 Orijinal metin no: [120a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mustafa’nın menzilini oğlu Abdullah Çelebi’ye satması Mahmiye-i İstanbul’da Sinan Paşa mahallesi sükkânından Mehmed Çelebi b. Mustafa nâm kimesne tarafından husûs-ı âti’z-zikri ikrâra vekîl olduğu Mehmed b. Hüseyin ve Mustafa b. Abdullah şehâdetleriyle şer‘an sâbit olan Ahmed Çelebi b. Mustafa meclis-i şer‘-i şerîf-i enverde müvekkil-i mezbûrun sulbî oğlu işbu râfi‘ü’l-kitâb Abdullah Çelebi mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan âhar mülküm ve bir tarafdan Râbia Hâtun mülkü ve bir tarafdan vakıf menzil ve bir tarafdan tarîk-i âm ile mahdûd üç bâb tahtânî oda ve bir tahtapûş ve bi’r-i mâ ve bahçe ve havluyu müştemil mülk menzilini, bi cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile oğlu mezbûr Abdullah Çelebi’ye on sekiz bin akçeye bey‘ ve temlîk ve teslîm edip ol dahi iştirâ ve kabûl ve temellük ve tesellüm eyledikden sonra semeni olan meblağ-ı merkūm on sekiz bin akçeyi yedinden tamâmen ahz u kabz eyledi fîmâ ba‘d menzil-i merkūm mezbûr Abdullah Çelebi’nin mülk-i müşterâsı olmuşdur keyfe mâ yeşâ mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Abdullah Efendi b. Mehmed, Mehmed Çelebi b. Ahmed, Ali Beşe b. Mustafa, Receb Çelebi b. Ömer.